به‌شار ئه‌سه‌د: دڤێت توركیا سۆزێن كو به‌ری نها داینه مه بجه بینیت
ئه‌ڤرۆ:
سه‌رۆكێ سووریێ د داخۆیانیه‌كێ دا راگه‌هاند كو په‌یوه‌ندیێن وان و توركیا باشتر لێ دهێن، لێ دڤێت توركیا وان سۆزێن كو ڤێ دووماهیێ داینه بجه بینیت، چونكی توركیا و سووریێ پێكڤه دشێن گه‌له‌ك ئاریشێن هه‌ی چاره‌سه‌ر بكه‌ن.
به‌شار ئه‌سه‌دێ سه‌رۆكێ سووریێ د داخۆیانیه‌كێ دا بۆ ده‌زگه‌هێن راگه‌هاندنا وه‌لاتێ خوه دیار كر كو په‌یوه‌ندیێن وان و توركیا نها د بیاڤێ هه‌والگریێ دا باشن و هه‌روه‌سا كار بۆ هندێ ژی دهێته كرن كو د بیاڤێ سیاسی دا ده‌ست ب قۆناغه‌كا نوو د ناڤبه‌را هه‌ر دو وه‌لاتان دا بهێته كرن، ژ به‌ر هندێ ژی گرنگه توركیا وان سۆزێن كو ڤێ دووماهیێ داینه مه بجه بینیت و گۆت: (رۆسیا گه‌له‌ك بزاڤ كرینه دا كو ئه‌م و توركیا ده‌ست ب قۆناغه‌كا نوو بكه‌ین، مه ژی به‌ری نها مه‌رجێن خوه دیار كرینه، چونكی وه‌كو سووریێ ئه‌م بێی مه‌رج ل گه‌ل توركیا ده‌ست ب قۆناغه‌كا نوو ناكه‌ین، هه‌لوه‌ستێ ڤێ دووماهیێ یێ توركیا گه‌له‌ك باشه و نها ئه‌م چاڤه‌رێی هندێ نه كو توركیا ژی وان سۆزێن كو ڤێ دووماهیێ داینه مه بجه بینیت).
ده‌زگه‌هێن راگه‌هاندنا توركیا ژی دیار دكه‌ن كو شانده‌كێ ده‌زگه‌هێ هه‌والگریا توركیا به‌ری ده‌مه‌كێ سه‌ره‌دانا سووریێ كریه و سه‌باره‌ت ب چه‌ندین بابه‌تان ل گه‌ل شامێ دانوستاندنان كرینه، توركیا دڤێت بابه‌تێ په‌نابه‌رێن سووری چاره‌سه‌ر بكه‌ت، چونكی نها ره‌وشا ئابووری یا توركیا باش نینه و په‌نابه‌رێن سووری یێن ل توركیا ژی بووینه بارگرانی ل سه‌ر ئه‌نقه‌ره و ژ به‌ر هندێ ژی توركیا دڤێت ب رێیا ئاساییكرنا په‌یوه‌ندیێن خوه ل گه‌ل سووریێ خوه ژ وێ بارگرانیێ قورتال بكه‌ت، خالا دی ژی توركیا دڤێت سووریێ د بابه‌تێ په‌یه‌دێ دا هاریكاریا وێ بكه‌ت و هه‌تا نها ژی هه‌ر دو وه‌لات ل سه‌ر وان خالان دانوستاندنان دكه‌ن.
چاڤدێرێن سیاسی ژی دیار دكه‌ن كو بێی ئه‌مریكا و رۆسیا چو گوهۆرینێن مه‌زن ل سووریێ روو ناده‌ن، هه‌كه توركیا و سووریێ ده‌ست ب دانوستاندنان بكه‌ن ژی دڤێت رۆسیا و ئه‌مریكا ل سه‌ر پرۆژێ وان هه‌ر دو وه‌لاتان رازی بن، چونكی نها هه‌م ئه‌مریكا و هه‌م ژی رۆسیا ل سووریێ بهێزن و وان هه‌ر دو وه‌لاتان ژی پرۆژێن خوه بۆ پاشه‌رۆژا سووریێ هه‌نه، ژ به‌ر هندێ ژی دڤێت توركیا و سووریێ ل گه‌ل ئه‌مریكا و رۆسیا ژی دانوستاندنان بكه‌ن، چونكی بێی رازیبوونا هه‌ر دو وه‌لاتێن زلهێز چو پرۆژه‌یه‌ك ل سووریێ یا سه‌ركه‌فتی نابیت، به‌ری نها ژی گه‌له‌ك جاران ئه‌مریكا و رۆسیا به‌حسێ پرۆژێن خوه بۆ پاشه‌رۆژا سووریێ كرینه و ب تایبه‌تی ژی به‌ری ده‌مه‌كێ رۆسیا راگه‌هاند كو وان دڤێت ره‌وشا سووریێ ئاسایی بیت و داخواز ژ ئه‌مریكا ژی كر كو هه‌موو هێزێن خوه ژ ئاخا سووریێ ڤه‌كێشیت.
