شیره‌تكارێ ئه‌لمانیا ب توندی هۆشداریێ دده‌ته پۆتینی
ئه‌ڤرۆ:
ئۆلاف شولز شیره‌تكارێ ئه‌لمانیا راگه‌هاند كو پۆتین د شه‌رێ ل ئۆكرانیایێ دا هه‌موو قانوونێن نێڤده‌وله‌تی بنپێ كرینه و د راستی دا یا نها ل ئۆكرانیایێ ب فه‌رمانا پۆتینی روو دده‌ت تاوانا شه‌ڕی یه، لێ هه‌تا نها ژی پۆتینی نه‌شیایه كو سه‌ركه‌فتی بیت و دیاره سه‌ركه‌فتی ژی نابیت، پۆتین تنێ زیان نه‌گه‌هاندیه ئۆكرانیایێ به‌لكو ژ به‌ر شه‌ڕێ نها زیانێن گه‌له‌ك مه‌زن گه‌هشتینه رۆسیا و هه‌كه ره‌وش وه‌سا به‌رده‌وام بكه‌ت دێ رۆسیا تووشی قه‌یرانێن گه‌له‌ك مه‌زن بیت ب تایبه‌تی ژی قه‌یرانا ئابووری.
ناڤهاتی ئه‌و یه‌ك ژی دیار كر كو دڤێت پۆتین شه‌ڕێ نها ل ئۆكرانیایێ ب دووماهی بینیت، چونكی یا پۆتینی دڤیا بده‌ستڤه نه‌ئینا و درێژكرنا شه‌ڕی ژی بێگومان دێ بیته ئه‌گه‌رێ روودانا كاره‌ساتێن مه‌زن یێن مرۆڤی و باشتره پۆتین هه‌موو هێزێن خوه ژ ئاخا ئۆكرانیایێ ڤه‌كێشیت و گۆت: (به‌رنامێ پۆتینی ل ئۆكرانیایێ تووشی شكه‌ستنێ هات و نها ژی پۆتینی دڤێت د وه‌رزێ زڤستانێ دا ده‌ست ب ئێرشه‌كا نوو ل سه‌ر ئۆكرانیایێ بكه‌ت، هه‌كه تشته‌ك وه‌سا روو بده‌ت دێ گه‌له‌ك وه‌لاتیێن سڤیل بنه قوربانی، براستی ژی رۆسیا ل ئۆكرانیایێ تاوانێن شه‌ڕی ئه‌نجام داینه و دڤێت پۆتین و به‌رپرسێن دی یێن رۆسیا ژ به‌ر تاوانێن كو ل ئۆكرانیایێ ئه‌نجام داینه بهێنه سزادان).
