لارایێ هه‌ڤالینیه‌كا باش ل گه‌ل گیانه‌وه‌ران هه‌یه
دهۆك ، زنار تۆڤی:
قوتابی (لارا نوری) كو نوكه ل پۆلا هه‌شتێ بنه‌ره‌تی یه ل قوتابخانا له‌یلان ل سنۆرێ په‌روه‌ردا دهۆك رۆژئاڤا، د دیداره‌كێ دا بۆ رۆژناما ئه‌ڤرۆ دیاركر كو ئه‌و ل مال گیانه‌وه‌رێن وه‌كو ماری و كیسه‌لی و ژیژی و پشیكان و چویچكان بخودان دكه‌ت، ئه‌و پتر حه‌ز ژ بخودانكرنا ماران دكه‌ت و ئه‌و جۆره‌كێ ماران بخودان دكه‌ت، كو ل بیابانان دژیت و وی جۆرێ ماری ژه‌هر نینه و ئه‌و ماره گوشتی و هێكێن كه‌لاندی دخوت.
زێده‌تر گۆت: درێژاهیا وی ماری دگه‌هیته دو مه‌تر و نیڤان و سالێ جاره‌كێ تیڤلێ خۆ دگۆهۆڕیت، هه‌روه‌سا وێ شاره‌زایی د خودانكرنا ماران دا هه‌یه و ئه‌و دوێریت ده‌ستێ خۆ بكه‌ته هه‌موو جۆرێن ماران و ژێ ناترسیت، ئه‌و گه‌له‌ك خۆشییێ ژ بخودانكرنا گیانه‌وه‌ران دبینیت، ب تایبه‌تی ژی بخودانكرنا ماران، هه‌روه‌سا د زارۆكاتییا خوه دا وێ گه‌له‌ك حه‌ز ژ گیانه‌وه‌ران دكر، د مال دا ب تنێ ئه‌و گیانه‌وه‌ران بخودان دكه‌ت، دایك و بابێن وێ ژی پشته‌ڤانیێ ل وێ دكه‌ن و هه‌ر گیانه‌وه‌ره‌كێ وێ بڤێت بۆ وێ په‌یدا دكه‌ن و وێ هه‌ڤالینیه‌كا باش ل گه‌ل گیانه‌وه‌ران هه‌یه و چو جاران ئه‌و وان نائێشینیت.
