ئهردێ دێم و ئاڤی ل ههرێما كوردستانێ دێ هێته ژێكجوداكرن
ههولێر، قائید میرۆ:
بهرپرسهكا وهزارهتا چاندنێ ئاشكرا كر، پلان ههیه جارهكا دی پێداچوون د ئهردێ چاندنێ دا هێتهكرن و ئهردێ دێم و یێ ئاڤی دێ هێته ڤاڤارتن و جوداكرن. ههروهسا دبێژیت: سیاسهتا حوكمهتا ههرێما كوردستانێ ئهوه كهرتێ چاندنێ ببیته كهرتهكێ سهرهكی و سهرۆكێ حوكمهتێ ژی چهندین جارا ئهڤه پشتڕاستكریه، لهوڕا ژی دێ ههموو هاریكاری و پشتهڤانی بۆ كهرتێ چاندنێ هێنهكرن.
د. زێدا محهمهد، رێڤهبهرا گشتیا پلاندانانێ ل وهزارهتا چاندنێ بۆ رۆژناما ئهڤرۆ دیار كر “وهزارهتا چاندنێ سالانه پلانا خوه یا چاندنێ بۆ وهزارهتا چاندنا بهغدا بلند دكهت، ب مهرهما پهسهندكرنێ، ئهڤ ساله ژی مینا سالێن بۆری پلانا خوه هنارتیه، ئهو ژی ل دۆر ئهو ئهردێ دهێته بكار ئینان بۆ مهرهمێن چاندنێ.
زێدهتر گۆت: مه ل ههرێما كوردستانێ دو جۆرێن ئهردی ههنه، ئهردێ دێم و ئهردێ ئاڤی، ئهردێ دێم زێدهتر ژێدهرێ ئاڤدانێ بۆ هاتنا بارانێ ڤهدگهڕیت و بۆ مهرهمێن گهنمی دهێته بكارئینان، بهلێ مه پلانهكا دی ههیه وهكی چاندنا ههرێما كوردستانێ، ئهو ژی دووباره پێداچوونێ ب رووبهرێ ئهردێ چاندنێ دا بكهن، ئهو ژی ب رێیا ئامیرێن پێشكهفتی.
رێڤهبهرا گشتیا پلاندانانێ ل وهزارهتا چاندنێ خویاكر، چونكه پێدڤی ب پێداچوونێ ههیه و چهندین ساله پێداچوون بۆ نههاتیهكرن. بۆ نموونه ئهرد ههبوویه بهری نوكه یێ دێم بوویه، بهلێ پشتی بیرا ئاڤێ بۆ هاتیه دابین كرن، رهگهزێ ڤی ئهردی هاتیه گۆهۆڕین ژ دێمی بۆ ئاڤی، ئهڤه ئێكه ژ پلانێن وهزارهتا چاندنێ دووباره رۆپیڤان بۆ ئهردێ چاندنێ بهێتهكرن، چونكه وی دهمی دیار دبیت مه چهند ئهردێ دێمی ههیه و چهند یێ ئاڤیه، ههر چهنده ل گۆرهی ههموو ئامارێن بهردهست ئهردێ دێم زێدهتره، بهلێ پێدڤی ب پێداچوونێ ههیه، ههتا ئامارێن دروست بهێنه پهیداكرن.
رێڤهبهرا گشتیا پلاندانانێ گۆت “حوكمهتا ههرێما كوردستانێ نوكه زێدهتری ههر دهمهكی گرنگیێ ب كهرتێ چاندنێ ددهت، چونكه حوكمهت دخوازیت كهرتێ چاندنێ ببیته كهرتهكێ سهرهكی ل ههرێما كوردستانێ، د چوارچوڤێ پشتهڤانێن حوكمهتا ههرێما كوردستانێ ژی چوار ملیار دینار ژلایێ سهرۆكایهتیا جڤاتا وهزیران هاتینه مهزاختن بۆ ژناڤبرنا وان قركهرێن، سالانه دبنه ئهگهرێ ژناڤبرنا بهرههمێ جوتیارێن ههرێما كوردستانێ”.
دكتۆر زێدا محهمهد ئاماژه كر “نوكه ئهو چوار ملیار دینارێن هاتینه مهزاختن ژ بۆ ژناڤبرنا وان گیانهوهرێن دبنه ئهگهرێ زیان گههاندنێ ب گهنمێ جووتیاران ل وهزارهتا داراییه و پشتی رێكارێن قانوونی و كارگێڕی ئهو پاره دێ ل سهر ههموو جووتیارێن ههرێمێ هێته بهلاڤكرن.
ئهو ژی دیار كر، ئهڤه ژی هاریكاریهكا باشه بۆ كهرتێ چاندنێ، چونكه ههر سال هندهك گیانهوهرێن وهك سنكو كیسهلا دبنه ئهگهرێ ژناڤبهرا بهرههمێ جووتیاران، ل سالێن بهری نوكه ژی بهردهوام حوكمهتێ ب رێیا وهزارهتا چاندنێ هاریكاری ل سهر جووتیاران بهلاڤكرینه، وهزارهتا چاندنێ دێ بهردهوامبیت ل سهر سیاسهتا خوه وهكی پشكهك ژ حوكمهتا ههرێما كوردستانێ بۆ گرنگیدانێ ب كهرتێ چاندنێ.
