مه‌زنترین كارگه‌ها زه‌یتا زایتونان ل شێخان هاته چێكرن
ئه‌ڤرۆ، نه‌وزاد هلۆری:
ب مه‌ره‌ما ب بازاڕكرنا زه‌یتون و په‌یداكرنا ده‌لیڤێن كاری بۆ خه‌لكێ ده‌ڤه‌رێ، مه‌زنترین كارگه‌ها زه‌یتا زیتون و سابوونێ ل ئیراق و كوردستانێ ل شێخان دهێته چێكرن.
رێڤینگ شێخكی، رێڤه‌به‌رێ كارگه‌ها زه‌یتا زه‌یتون و سابوونێ ل شێخان بۆ ئه‌ڤرۆ گۆت: (ب مه‌ره‌ما خزمه‌تكرنا خه‌لكێ ده‌ڤه‌رێ و په‌یداكرنا ده‌لیڤێن كاری و ب بازاڕكرنا زه‌یتونێن جۆتیاران، د نوكه دا كار ل سه‌ر دروستكرنا مه‌زنترین كارگه‌ها زایتا زه‌یتون و سابوون و ره‌ژیێ ل ده‌ڤه‌را شێخان دهێته كرن).
زێده‌تر گۆت: (ئه‌ڤ كارگه‌هه بۆ به‌رهه‌مێ زه‌یتونانه ل هه‌موو پارێزگه‌ها دهۆكێ و ده‌ڤه‌رێن دی یێن كوردستانێ، به‌لێ ژۆبه‌ركو ل سنوورێ ده‌ڤه‌رداریا شێخان زورترین زه‌یتون هه‌نه، له‌وا كارگه‌هـ ژی هه‌ر ل شێخان دهێته چێكرن، ب رێیا دروستكرنا كارگه‌هێ دێ ب ده‌هان ده‌لیڤێن كاری بۆ خه‌لكێ ده‌ڤه‌رێ په‌یدا بن و مفایه‌كێ هه‌ری باش گه‌هینیته وه‌لاتیان).
ناڤبری دیار كر ژی كو كارگه‌هـ ژ لایێ دابین گروپ دهێته چێكرن و گۆت: “قووناغا ئێكێ یا كارگه‌هێ دێ چێكرنا زه‌یتا زه‌یتونان بیت، قووناغا دویێ دێ چێكرنا سابوون و ره‌ژیێ بیت، د ده‌مه‌كێ نێزیك دا كارگه‌ه دێ ب دووماهی هێت و كه‌ڤیته د خزمه‌تا وه‌لاتی و خه‌لكێ ده‌ڤه‌رێ دا).
سالانه ل ده‌ڤه‌را شێخان زورترین زه‌یتون ل هه‌رێما كوردستانێ دهێنه به‌رهه‌مئینان، ب تایبه‌تی ل ره‌خ و دۆرێن لالش، خه‌تار، باشیك و به‌حزان و دوروبه‌رێن ئه‌لقوشێ.
