ئه‌مین ئامێدی: چاندن دێ بیته ژێده‌ره‌كێ سه‌ره‌كی یێ داهاتی بۆ حۆكمه‌تا هه‌رێمێ
ئه‌ڤرۆ، سالار دۆسكی:
پرۆگرامێ چاندنێ ل ته‌له‌ڤزیونا دهۆك 30 سال ژ ژیێ خوه ده‌ربازكرن، بوویه مینبه‌ره‌ك بۆ ته‌خا جوتیاران و به‌رده‌وام ل گه‌ل پێشكێشكاری بووینه. پێشكێشكارێ پرۆگرامی دیار كر، سه‌رۆكێ حوكمه‌تێ دووپاتی كریه، هه‌كه چاندن هه‌بیت دێ پێشه‌سازی هه‌بیت و هه‌كه پێشه‌سازی هه‌بیت دێ بازرگانی هه‌بیت، تشتێ به‌رده‌وام دێ چاندن بیت و گه‌شبینكرم كو 30 سالێن خزمه‌تا من د بیاڤێ راگه‌هاندنێ دا وه‌ك چاندن به‌لاش نه‌چوون و هوسا دبینم چاندن دێ بیته ژێده‌ره‌كێ سه‌ره‌كی یێ داهاتی بۆ حكومه‌تا هه‌رێما كوردستانێ.
رێكه‌فتی 12/ 5/1992 ئێكه‌م خه‌له‌كه ژ به‌رنامێ (چاندن) ژ ل ته‌له‌ڤزیونا (خه‌بات) یا وی ده‌می و ته‌له‌ڤزیونا (دهۆك) یا نوكه هاته پێشكێشكرن، ئه‌مین ئامێدی، به‌رهه‌ڤكه‌ر و پێشكێشكارێ پرۆگرامێ چاندنێ و ب هه‌لكه‌فتا بورینا 30 سالان ل سه‌ر ده‌ربازبوونا ڤی پرۆگرامی بۆ رۆژناما ئه‌ڤرۆ گۆت: هزرا پرۆگرامی یا (محسن قوچان) بوویه و من ده‌ست ب پرۆگرامی كر، ل ده‌ست پێكێ ب سترانا (رابه جوتیار دێ هلو رابه بچینه عه‌ردێ چول و به‌یار) وه‌ك ده‌ست پێكا تایتلێ به‌رنامه‌ی و هه‌تا ئه‌ڤرۆ پرۆگرام یێ به‌رده‌وامه. ب راستی ڤێ سترانێ ناڤه‌رۆكا وێ و ئاوازێن وێ تامه‌ك و خۆشیه‌ك و هه‌ستكا نشتیمانی دا من، چونكو ناڤه‌روكا سترانێ گه‌له‌ك د گونجایینه دگه‌ل ناڤه‌روكا هه‌موو به‌رناما و به‌رنیاسینه‌ك دا من هه‌تا ئه‌ڤرۆ و گه‌له‌ك بینه‌ر و گوهدار ژی دبێژن ده‌مێ مه گوهـ ل ڤی سترانێ دبیت هه‌سته‌كا نشتیمانی یا مه‌زن بوومه په‌یدادبیت بۆ وارێ مه عه‌ردێ مه و ئاخا مه و ب ڤێ سترانی ئه‌م د زانین به‌رنامێ چاندنێ یه.
زێده‌تر گۆت: ژ به‌ر كو گه‌له‌ك داخازی ل سه‌ر به‌رنامه‌ی هه‌بوون، ناچار بووین ب رێكا راپۆرتێن رۆژانه و مێزگه‌ردا په‌یامین شیره‌تێن چاندنێ بگه‌هیننه جوتیار و ره‌زڤانا و مێشه‌ڤانان، هه‌تا نوكه ژ سالا 1992ێ نێزیكی 1465 خه‌له‌كه هاتینه پێشكێشكرن، هه‌ژمارا راپورتێن رۆژانه دگه‌ل به‌رنامی باغێ مالێ دا 1486 بووینه، ل 3/11/1994 من ده‌ست ب پرۆگرامێ (رێبازا چاندنێ) ل رادیۆیا دهۆك كر، ژ به‌رهه‌فكرن و پێشكێشكرنا من بوویه و به‌رده‌وامه هه‌تا نوكه (1563) خه‌له‌كه هاتینه پێشكێشكرن و هژمارا راپورتان (812) و (162) دیدار ل پرۆگرامێ سپێده باش هاتینه پێشكێشكرن، زێده‌باری رادیۆیێن (ئامێدی، سیلاڤا ئامێدی، ئاكرێ، زاخۆ) دروستكرنا (28) خه‌لكا ژ پرۆگرامێ چاندنێ بۆ سه‌ته‌لایتا كوردستان كه‌نالێ ئاسمانی.
ئه‌مین ئامێدی گۆت: پرۆگرامێ چاندنێ چو ئاریشه بوومن دروست نه‌كرینه، به‌لكو پتر دیاركریمه كو مرۆڤه‌كێ به‌رهه‌مدارم و دێ شێم خزمه‌ته‌كێ بۆ ملله‌تێ خوه كه‌م و تایبه‌ت د بیاڤێ ئابووری دا، ل سالا 1992 ده‌مێ من ده‌ست ب پرۆگرامی كری گه‌له‌ك هه‌ژاری هه‌بوو و حوكمه‌تا عیراقێ خوه ڤه‌كێشا بوو وه‌ك له‌نگه‌كێ كه‌فتی و مووچه لاواز بوون و خه‌لكێ مه به‌رێ خوه دا چاندنێ.
ناڤبری گۆت: خوه سه‌ربلند دبینم ب ڤی پرۆگرامێ چاندنێ د دانم 12 زانست و من بزاڤكرینه د هه‌ر 12 زانستان دا مه‌له‌ڤان بم و سوپاس بۆ خودێ سه‌ركه‌فتم، هێشتا ژ زارۆكینیێ مه كارێ چاندنێ كریه و دشێم بێژم خوارنا من 90% ژ چاندنێ یه و گۆتنه‌ك هه‌یه دبێژیت به‌ری 40 سالیێ تو به‌رخی بخو و پشتی 40 سالیێ به‌رخ چ خوت تو ژی وی بخو و هه‌ر كه‌سه‌كێ خوارنا وی ل سه‌ر چاندنێ بیت بێ گومان دێ ساخله‌می یا وی یا باش بیت، هه‌تا 12 ده‌مژمێران دناڤا بیاڤێن چاندنێ دا مه.
ئه‌مین ئامێدی گۆت ژی: ب ڤێ گۆتنێ به‌رنیاسم (من دگۆت و گۆته‌ڤه و دێ بێژم و بێژمه ڤه) به‌ری چه‌ند رۆژان رێزدار مه‌سرور بارزانی په‌یڤه‌ك پێشكێشی خه‌لكێ كوردستانێ كر و گه‌شبینكرم، سه‌رۆكێ حوكمه‌تێ دووپاتی كر كو هه‌كه چاندن هه‌بیت دێ پیشه‌سازی هه‌بیت و هه‌كه پیشه‌سازی هه‌بیت دێ بازرگانی هه‌بیت، تشتێ به‌رده‌وام دێ چاندن بیت و گه‌شبینكرم كو 30 سالێن خزمه‌تا من د بیاڤێ راگه‌هاندنێ دا وه‌ك چاندن به‌لاش نه‌چوون، دیسا رێزگرتنا ناڤه‌ندا خانی یا ره‌وشه‌نبیری و راگه‌هاندنێ ژی ل خزمه‌تا من یا 30 سالێن بوری ماندیبوونا من یا 30 سالان ژ بیرا من بر و نه‌چاركرم ب خوینه‌كا گه‌رمتر كارێ خوه به‌رده‌وام بم و خزمه‌تا چاندنێ و جوتیاران بكه‌م و رۆژانه هه‌تا 15 په‌یوه‌ندیان بۆ من دهێن ژ جوتیاران و پرسیار ژ من دهێنه‌كرن و ب ڤێ چه‌ندێ سه‌ربلندم، بنه‌مایێ ئابووری یا هه‌ر وه‌لاته‌كی چاندنه.
ئه‌مین ئامێدی ئه‌و ژی گۆت: هه‌كه مووچه به‌رده‌وام بن خه‌لكێ مه ژ چاندنێ دوور دكه‌ڤیت و ئه‌ڤه جهێ داخێ یه، به‌لێ ب خوشحالی ڤه ل ڤان سالێن دووماهیێ خه‌لكێ مه لێ زڤرین كریه و پرۆژێن مه‌زن ده‌ستپێكرینه وه‌ك پرۆژێن دارۆباری و په‌له‌وه‌ران و پتاتا و خودانكرنا چێل و گولكان و به‌رهه‌مه‌كێ باش ل بازاری دایه و به‌رهه‌مێ چاندنێ یێ دچیته ده‌رڤه و ئه‌ڤه ئاریشه‌كا سه‌ره‌كی بوو و هه‌كه ئه‌ڤ ئاریشه هاته چاره‌سه‌ركرن.
