10 ساله خه‌لكێ ده‌ڤه‌را بارزان چاڤه‌رێ پرۆژه‌كێ ئاڤێ دكه‌ن
ئه‌ڤرۆ، نه‌وزاد هلۆری:
ب مه‌ره‌ما دابینكرنا ئاڤا پاقژ، پتری 10 ساله كار ل سه‌ر چێكرنا پرۆژه‌كێ ئاڤێ ل سه‌ر رووبارێ ئاڤا شین ل گوندێ بالندا دهێته‌كرن و هێشتا ب داوی نه‌هاتیه كو بریار بوو د سێ سالان دا ب داوی بهێت.
بابێ زناری، وه‌لاتیه‌كێ ده‌ڤه‌را بارزانه دیار كر، چه‌ند ساله‌كه كار ل سه‌ر چێكرنا پرۆژه‌كێ ئاڤێ ل سه‌ر رووبارێ ئاڤا شین ل گوندێ بالندا دهێته‌كرن و هه‌تا نوكه ب داوی نه‌هاتیه و گۆت: (پرۆژه ئێك ژ پرۆژێن گرنگ و ستراتیجیه بۆ دابینكرنا ئاڤا پاقژ بۆ هه‌موو گوندێن ده‌ڤه‌را بارزان، به‌لێ هێشتا ب داوی نه‌هاتیه و خه‌لكه‌كێ زۆر چاڤه‌رێ دكه‌ت كو ب داوی بهێت، ئه‌گه‌ر پرۆژه ب داوی بهێت د مفایه‌كێ زۆر باش بۆ خه‌لكێ ده‌ڤه‌رێ هه‌بیت، چونكه هه‌ر جار جار ئاریشا ئاڤێ ل گوندوارێن ده‌ڤه‌رێ دروست دبیت).
زیاب بارزانی، رێڤه‌به‌رێ فه‌رمانگه‌ها ئاڤێ ل بارزان ل سه‌ر ڤی بابه‌تی بۆ ئه‌ڤرۆ گۆت: (پرۆژێ ئاڤا گوندێن ده‌ڤه‌را بارزان چه‌ند ساله‌كا به‌ری نوكه ده‌ست ب چێكرنا وی هاتیه‌كرن، ژبه‌ر ره‌وشا دارایی چێكرنا وێ گیروبوویه، پرۆژه دێ ئاڤێ بۆ 51 گوندێن سنورێ ده‌ڤه‌را بارزان دابین كه‌ت و ئێكه ژ پرۆژێن هه‌ری گرنگ و ستراتیجی، به‌لێ ل سایا كابینا نه‌هێ یا حوكمه‌تا هه‌رێما كوردستانێ جاره‌كا دی ده‌ست ب چێكرنا وێ هاتیه‌كرن ڤه و هه‌تا نوكه 76% ژ پرۆژه‌یی هاتیه چێكرن و ب كوژمێ 138 ملیار دینار ل سه‌ر بودجا حوكمه‌تا هه‌رێما كوردستانێ بۆ پرۆژه‌ی هاتینه مه‌زاختن، ب ئانه‌هیا خودێ ئه‌گه‌ر چو ئاریشه‌یێن نوو دروست نه‌بن، دێ ل هاڤینا سالا 2024ێ پرۆژه داوی هێت و كه‌ڤیته د خزمه‌تا وه‌لاتیان دا و ئاریشا ئاڤێ ل ده‌ڤه‌رێ نامینیت).
زێده‌تر گوت: (پڕۆژه‌ێ ئاڤا بارزان پروژه‌ێ ستراتیجییه، دێ ئاڤێ بۆ 51 گوندێن ده‌ڤه‌رێ یێن سه‌ر ب هه‌ردوو ناحیێن بارزان و گوره‌توه دابین كه‌ت، ل گه‌ل هه‌رسێ گوندێن سه‌ر ب ناحیا دینارتی وه‌كی گوندێن هه‌رنێ و پرێسه و بیره‌كه‌پرا، پرۆژه پێك هاتییه ل جهێ وه‌رگرتنا ئاڤێ ل سه‌ر ڕووباری ئاڤا شین ل گوندێ بالندا، 200 كیلومتر بوریت دكتایل ب تیرێت جودا یێن 100ملم تا كو 500ملم د پرۆژه‌ی دا هاتینه بكارئینان بۆ ڤه‌گوهاستنا ئاڤێ، ل گه‌ل 350كم بوریێن پولی ئه‌سلین ب تیرێت جودا یێن 75ملم هه‌تا 200ملم بو تورا نافخویا گوندا، ل گه‌ل دروستكرنا كوگه‌هێن ئاڤێ ل 100م3 هه‌تا 8000 م3 بۆ هه‌ر گونده‌كێ، ب ته‌مامبوونا ڤێ پڕوژه‌ی دێ مفاییه‌كێ هه‌ری زۆر گه‌هیته وه‌لاتیێن ده‌ڤه‌ری، له‌وا د نوكه دا ب رژدی كار ل سه‌ر پرۆژه‌ی ب به‌رده‌وامی دهێته‌كرن بۆ هندێ زوترین ده‌م داوی بهێت).
