104 عمبارێن هه‌لگرتنا به‌رهه‌مێ چاندنێ دێ هێنه دروستكرن
ئه‌ڤرۆ:
رێڤه‌به‌رێ گشتی یێ چاندنێ ل پارێزگه‌ها دهۆكێ ئاشكرا كر، كابینه‌یا نه‌هێ یا حكومه‌تا هه‌رێما كوردستانێ گرنگیه‌كا مه‌زن ب به‌رهه‌مێ خۆمالی یێ جۆتیاران و دروستكرنا عمباران بۆ هه‌لگرتنا به‌رهه‌مێن وان دده‌ت و دبێژیت: حكومه‌ت هه‌موو ئاسانكاریان بۆ دروستكرنا عمبارێن هه‌لگرتنا به‌رهه‌مێ جۆتیاران دكه‌ت.
ئه‌حمه‌د جه‌میل، رێڤه‌به‌رێ گشتی یێ چاندنێ ل پارێزگه‌ها دهۆكێ بۆ ئاژانسا خانی دیار كر، ل سنوورێ پارێزگه‌ها دهۆكێ 52 عمبارێن هه‌لگرتنا به‌رهه‌مێ جۆتیاران هاتینه دروستكرن و گۆت: “نوكه رازیبوون ل سه‌ر دروستكرنا هه‌ژماره‌یه‌كا دی یا عمباران هاتیه كرن كو هه‌موو دبنه 104 عمبارێن هه‌لگرتنا به‌رهه‌مێ ناڤخوه و هه‌موو ژی ل سنوورێ ده‌ڤه‌رداریێن شێخان، به‌رده‌ڕه‌ش و سێمێلێ دێ هێنه دروستكرن”.
گۆتژی: “مه‌ره‌م ژ دروستكرنا وان عمباران ئه‌وه، ده‌مێ به‌رهه‌م دگه‌هیت هه‌موو ب ئێكجاری نه‌كه‌ڤیته د بازاری دا و هنده‌ك به‌رهه‌م بۆ وه‌رزه‌كێ دی بهێته هه‌لگرتن و جۆتیار بشێن مفای ژ به‌رهه‌مێن خوه ببینن و قووناغ ب قووناغ بێخنه د بازاری دا”.
رێڤه‌به‌رێ گشتی یێ چاندنێ خویا ژی كر، دهۆك دێ بیته ئێكه‌م پارێزگه‌هـ ل سه‌ر ئاستێ هه‌رێما كوردستان و ئیراقێ بۆ عمباركرنا به‌رهه‌مێ ناڤخوه یێ جۆتیاران.
