بەنداڤا خنس دێ حەفت ملیۆن مەترێن سێجا یێن ئاڤێ ئەنبار كەت
ئەڤرۆ
كابینەیا نەهێ یا حوكمەتا هەرێما كوردستانێ ب رێیا وەزارەتا چاندن و ژێدەرێن ئاڤێ بۆ خزمەتكرنا كەرتی چاندنێ و كێمكرنا زیانێن هشكەسالیێ، گرنگیەكا تایبەت ب دروستكرن و نووژەنكرنا بەنداڤان دایە، د ڤی چارچوڤەی ژی دا بەنداڤا خنس ل پارێزگەها دهۆكێ، د قووناغا دووماهیێ و تاقیكرنێ دایە و شیانێن ئەنباركرنا حەفت ملیۆن مەترێن سێجا یێن ئاڤێ هەنە و گرنگیەكا زۆر بۆ كەرتێ چاندن، سامانێ گیانەوەری، كەرتێ گەشتوگوزاری و ئاڤا بن ئەرد هەبیت.
فەرهاد محەمەد، رێڤەبەرێ بەنداڤا دهۆكێ بۆ پێگەهێ فەرمیێ حوكمەتا هەرێما كوردستانێ گۆت: «هەموو كارێن بەنداڤا خنس تمام بووینە و دەست ب تاقیكرنا خوەراگری و بەرگریا بەنداڤێ هاتیە كرن».
گۆتژی: «بەنداڤا خنس ل سالا 2010 بڕیارا دروستكرنا وێ دەركەفتبوو، بەلێ ب تنێ 60% هاتبوو بجهئینان و كارێن وێ هاتبوونە راگرتن، د كابینەیا نەهێ دا ل سالا 2021 دوبارە كار ل سەر هاتە كرن و د سالا 2022 هاتە تەمامكرن، لێ ب مەرەما پشتڕاستبوون ژ هەموو كارێن تێدا هاتینە كرن، بۆ دەمێ دو سالان دێ چاڤدێریا وێ كەین».
بەنداڤا خنس دكەڤیتە سنوورێ دەڤەرداریا شێخان یا سەر ب پارێزگەها دهۆكێ ڤە، شیانێن ئەنباركرنا حەفت ملیۆن مەترێن سێجا یێن ئاڤێ هەنە، بلنداهیا وێ پتری 34 مەترانە و درێژاهیا وێ ژی 195 مەترە و ب گوژمێ نەه ملیار و 218 ملیۆن و 486 هزار و 750 دیناران هاتیە بجهئینان.
