ئیمارات پڕۆژەیەكێ مەزن یێ چاندنێ ل زاخۆ دێ بجهئینیت
ئەڤرۆ
زاخۆ، دلۆڤان هالۆ:
كۆمپانیەكا ئیماراتی ل ئیدارەیا سەربخوە یا زاخۆ پڕۆژەیەكێ وەبەرهێنانێ یێ چاندنێ یێ مەزن ب گوژمێ سێ ملیۆن دۆلاران بجه دئینیت.
ڕێڤەبەرێ پشكا مۆهلەتان ل دەستەیا وەبەرهێنانا حوكمەتا هەرێما كوردستانێ بۆ دەزگەهێن میدیایی ڕاگەهاندیە كو ژ بەر وێ هەماهەنگیا سەرۆكێ حوكمەتێ ل گەل ئیماراتێ، وی وەلاتی دڤێت ل هەرێما كوردستانێ وەبەرهێنانێ بكەت، ب تایبەت د بیاڤێ چاندن، گەشتوگوزار و پیشەسازی دا و گۆت: «نوكە كۆمپانیەكا ئیماراتی ل ئیدارەیا سەربخوە یا زاخۆ پڕۆژەیەكێ وەبەرهێنانێ یێ چاندنێ یێ مەزن ب گوژمێ سێ ملیۆن دۆلاران بجه دئینیت».
هەڤال سەدیق، ڕێڤەبەرێ پشكا مۆهلەتان ل دەستەیا وەبەرهێنانا حوكمەتا هەرێما كوردستانێ ئاماژە ب وێ چەندێ ژی كر كو ئەڤ پڕۆژە ژ چار پشكان پێك دهێت، سێ پشك هەر چار وەرزان دێ بەرهەم هەبیت، پشكا چارێ ژی دێ بیتە سەنتەرەكێ ڤەكۆلینان د بیاڤێ چاندنێ دا و گۆت: «ئەڤ پڕۆژە ل سەر ڕووبەرێ هزار دۆنەمان دهێتە بجهئینان، دێ هزار و 500 جۆتیار تێدا كار كەن».
گۆتژی: «ئەڤ پڕۆژە گەلەك یێ گرنگە و ب نووترین ئامیر و تەكنۆلۆژیا سەردەم دهێتە دروست كرن، د نوكە دا ئامادەكاری بۆ بجهئینانا وی هاتینە كرن و بەرێ بنیاتێ وی ژی ژ لایێ مەسرور بارزانی، سەرۆكێ حوكمەتا هەرێما كوردستانێ ڤە هاتیە دانان».
