د ئێك كیلومەتر دا حەفت تەوەر و دو پرۆژەیێن ئاكنجیبوونێ یێن هەین
ئەڤرۆ
ئەمیر ئەترووشی
ئابوورناسەكی ئاشكرا كر، جهێ دانانا تەوەرا و پرۆژەیێن ئاكنجیبوونێ ل دهۆكێ یێ گونجای نینە و ب بەرەلایی دهێنە دانان و نوكە ل سەنتەرێ دهۆكێ د ئێك كیلۆمەترا چوار گوشە دا ل دەوروبەری چواریانا زەری لاند، حەفت تەوەر و دوو پرۆژەیێن ئاكنجیبوونێ یێن هەین و ئەگەر ب دووماهی بهێن و خەلكەك تێدا ئاكنجی ببیت، رەنگە هند قەلەبالغ ل وێ چواریانێ پەیدا ببیت، جهـ بۆ هاتن و چوونا ترۆمبێلان نەمینیت.
د. كاوە عەبدولعەزیز، مامۆستایێ زانكۆیێ بۆ رۆژناما ئەڤرۆ دیار كر، نابیت وەبەرهێنەر و بازرگان د ئازاد بن بۆ دەستنیشانكرنا جهەكی بۆ تەوەری یان ژی پرۆژەیەكێ ئاكنجیبوونێ، بەلكو پێدڤیە حۆكمەتێ پلان و نەخشە بۆ باژێری هەبن و پێشوەخت پلان هاتبیتە دانان كا ل كیش جهی یان دەڤەرێ تەوەر و پرۆژەیێن ئاكنجیبوونێ بهێنە دانان و گۆت: دەمێ تەوەر یان ژی پرۆژەیەكێ ئاكنجیبوونێ ل جهەكی دهێتە دانان، دڤێت هزر ل هندێ بهێتە كرن كا دێ چو كارتێكرنێن نەرێنی ل سەر وی جهی هێلیت، بۆ نموونە قەلەبالغ پەیداببیت، ئاڤا دەڤەرێ و كارەب كێم ببن، یان ژینگەها دەڤەرێ ب هەبوونا زێدەیا مرۆڤا و ترۆمبێلان پیس ببیت.
ئابوورناس زێدەتر دبێژیت: بابەتێ نەخشەدانانا شارستانی یێ گرنگە و دڤێت پتر ژ روویەكی ڤە خواندن بۆ بهێتە كرن هەتا بڕیار بهێتە دان كا پرۆژەیەكێ ئاكنجیبوونێ یان تەوەرەك ل جهەكی بهێتە دانان كا دروستە یان نە، چونكو گەلەك جاران هزر ل سەر هندێ دهێتە كرن ئەڤ تاخە یان ئەڤ دەڤەرە یا گرنگ و ستراتیژی یە بۆ دانانا تەوەری و خەلكەكێ دەولەمەند لێ دژین، دێ تەوەرەكی لێ دانن و هزر دكەن دێ ب پارەكێ باش هێنە فروتن، هزرا هندێ ناكەن كا ژ روویێ نەخشەدانانا شارستانی ڤە دروستە یان نە.
ئاشكرا ژی كر، ل چواریانا زەری لاند، حەفت تەوەر و دوو پرۆژەیێن ئاكنجیبوونێ یێن هەین و ئەگەر ب دووماهی بهێن و خەلكەك تێدا ئاكنجی ببیت، بۆ نموونە حەفت تەوە ل سەر 30 قاتان دهێنە دانان و هەردوو كۆمەلگەهێن زەری لاند و مازی لاند یێن ئاكنجیبوونێ ل هەمان جهـ هەنە، و ب هزارەها یەكێن ئاكنجیبوونێ تێدانە و هەر یەكەكەیەكێ خێزانەك دێ تێدا ئاكنجی بیت و هەر خێزانەك رەنگە ترومبێلەك یان دوو هەبن و ئەگەر هەر خێزانەكێ رۆژانە ئێك مێهڤان بۆ بچیت، دێ چ پەیدابیت و دێ چەند بارگرانی ل سەر هێلێن ئاڤ و كارەبێ پەیدابیت.
د. كاوە عەبدولعەزیز، مامۆستایێ زانكۆیێ خویاكر، پێدڤیە حۆكمەتێ پێشوەخت پلان و ماستەر پلان هەبن كا هەر جهەكی بۆ چ تشتی یا گونجایە، كا چاوا جهی بۆ كەسكاتیێ و پارك و باخچا و كارگەهان دهەلبژێن، هوسا دڤێت پێشوەخت جهـ بۆ تەوەران و پرۆژێن ئاكنجیبوونێ هاتبنە دەستنیشانكرن و گۆت: خودێ نەكەت ئەرد هەژەك ل دهۆكێ پەیداببیت ژ نوو حۆكمەت بێژیت كا بەرێ خوە بدەنێ كا بۆچی ئاڤاهی یان تەوەرەك هەرفت، پێدڤیە بەری دانانا وان بنیاتەكێ مۆكۆم بهێتە دانان.
زێدەتر گۆت: من گەلەك دووڤچوون یا ل سەر پرۆژەیێن ئاكنجیبوونێ كری، بەلێ ب راستی ژی هندەك پرۆژە من دیتینە خوە مرۆڤ بۆ دوژمنێ خوە ژی وان پرۆژەیان چێناكەت، چونكو وەبەرهێنەر یێ قازانجەكێ مەزن و باش ژ وان پرۆژەیان دكەت و پێدڤیە ووژدانا خوە تەنا بكەت ب چێكرنا باشترین پرۆژە و یەكێن ئاكنجیبوونێ، هەروەسا پتریا وان پرۆژەیان ل دووڤ پلان و ماستەر پلانێ ناهێنە دانان و دیزاین و كەتوار گەلەك د ژێك دوورن و پێدڤیە حۆكمەت پێداچوونەكا باش د وان پرۆژەیان دا بكەت.
