شیرەتكارەكێ پەرلەمانێ كوردستانێ: سەرۆك وەزیرێن ئیراقێ دێ سەرەدانا پارێزگەها دهۆكێ كەت
ئەڤرۆ
سالار محەمەد دۆسكی:
پێخەمەت خورتكرنا پێكڤەژیانێ وەكو نموونەیەكا سەركەفتی ل دەڤەرێ دهێتە چاڤەڕێكرن سەرۆك وەزیرێن ئیراقێ سەرەدانا قەزا شێخان و پرسگەها لالش بكەت، قەرەبووكرنا خویشك و ژنێن ئێزدی و زڤراندنا ئیدارا شەرعی یا سنوونێ بۆ دەڤەرێ تەوەرێ سەرەكیێ هاتنا ناڤبری بیت بۆ دەڤەرێ.
شێخ زێدو باعەدری، شیرەتكارێ ئێزدی ل پەرلەمانێ كوردستانێ بۆ ڕۆژنامەیا (ئەڤرۆ)گوت» دهێتە چاڤەڕێكرن ل نێزیك سەرۆك وەزیرێن ئیراقێ( محەمەد شیاع سۆدانی ) سەرەدانا قەزا شێخان وەك نموونەیەكا پێكڤە ژیانێ د ناڤبەرا هەموو ئۆل و نەتەوەیان دا بکەت و هەروەسا دێ سەرەدانا پەرستگەها لالش كەت و ئەڤە دەمەكی دا هات كو ل ڕێككەفتی 25/2/2023 فائیق زێدان، نوونەرێ سەرۆك وەزیرێن ئیراقێ سەرەدانا قەزا ناڤبری كربوو و ل گەل میر و جڤاتا ڕوحانی یا ئێزدیان و قایمقام و ڕێكخستیێن جڤاكێ مەدەنی ل دەڤەرێ كۆمبوون ئەنجامدا ب مەرەما دروستكرنا ڕاپورتەكێ ل سەر دەڤەرێ بۆ سەرۆك وەزیرێن ئیراقێ و دیسا ڕێخوەشكرن بۆ هاتنا سەرۆك وەزیران و ئاگەەهداری ڕەوشێ بوون ژ نێزیك و دیسا د كۆمبوونەكا خوە دا ئاماژە ب هاتنا سەرۆك وەزیران بۆ دەڤەرێ كر ل دەمەكێ نێزیك بێی دیاركرنا ڕۆژا هاتنا وی بۆ دەڤەرێ».
گوت ژی» دانوستاندن ل سەر زڤرینا نوونەرێن ئیدارا شەرعی یا سنوونێ بۆ دەڤەرێ هاتەكرن كو دڤێت نوونەرێن شەرعی ڤەگەرن و ئیدارەیەكا شەرعی بۆ خەلكێ دەڤەرێ بهێتە دروستكرن».
دیاركر ژی كو د دیتنێن خوە دا ل گەل فائیق زێدان نوونەرێ سەرۆك وەزیرێن ئیراقێ بۆ دەڤەرێ كەسەكێ گەلەكێ فامكری بوو ل گەل میرحازم بەگ و قائیمقامێ قەزا شێخان و ل چارەسەریا كێشەیان دگەریێت و دیسا خواست كار ل سەر بەرهەڤكرنا ئامار و دەسپێكیێن دانا مووچەیەكی بۆ كچ و ژنێن ئێزدی ئەوێن پێشتر كەفتینە د دەستێ تیرۆرستێن داعشێ و زیندانان دا ماین بهێتە كرن، هەروەسا سوپاسیا ئیدارە و خەلكێ شێخان كر كو هەتا نوكە هەژمارەكا مەزن ژ خەلكێ شنگالێ د ناڤا كەمپان دا دژین».
خویاكر ژی» بۆ نوونەرێ سەرۆك وەزیرێن ئیراقێ هاتە دیاركرن كو ئێزدی نە ئاینەكێ مەترسی یە ل سەر چ كەسان و نە ئاینەكێ توندڕەوە و زمان و جلك و كەلتورێ خوە ب سەدان سالە پاراستی نە و هەردەم وەكو برا ل گەل هەموو ئاین و نەتەوەیان ل سەر ڤێ ئاخێ ژیاینە».
شێخ زێدو گوت ژی» نوونەرێ سەرۆك وەزیرێن ئیراقێ ئاشكراكر كو دڤێت ل گەل حوكمەتا هەرێما كوردستانێ تێكگەهشتنەك بهێتە دروستكرن، چونكە هەرێمێ گەلەك خزمەتا ئاواران كریە و بارەكێ گران ل سەر كوردستانێ هەیە د ڤی بواریدا».
