پرۆژەیێ (هەژماری من) د دوسالاندا دێ ب دووماهی هێت
ئەڤرۆ
سولین سلێمان
ل رۆژا ٢٨ شوباتا ئەڤ سالە ژ بۆ ئێكەم جار مەسرور بارزانی سەرۆكێ حوكمەتا هەرێما كوردستانێ پرۆژا (هەژمارا من) راگەهاند كۆ تێدا موچەیێن فەرمانبەران دێ پێ هێنە ئەلكترۆنیكرن و بریارە د ماوێ دوو سالێن بهێت دا ب دووماهی بهێت.
د. ئدریس رەمەزان مامۆستایێ زانكۆیێ پسپۆرێ ئابووری بۆ رۆژناما ئەڤرۆ دیار كر، ئەڤ پرۆژە ژ بۆ چینا كارمەند و حوكمەتێ گەلەك یا گرنگە و ئەڤ پێنگاڤە ژی ژ بۆ مە گەلەكا باشە وەكی وەلاتێن نیڤدەولەتی بەرڤ پێشبچین.
خویاكر ژی، ئەڤ پرۆژە پێنگاڤەكا گرنگە ژ بۆ ئابووریەكا بهێز بۆ رووبرووبونا گەندەلیێ گەلەكا فەرە، كەرتێن بانكی ل هەرێما كوردستانێ هەبن و د داهاتیێدا بهێنە جێبەجێكرن و گۆت: ئەڤ پرۆژە دێ ئاسانكاریێ كەت ژ بۆ گەهشتن ب هەموو خزمەتگوزاریێن بانكێن مودرێن و ژ وان ژی پاشەكەفتكرن و قەرز و پارەدانا دیجیتاڵی.
ئاماژەكر و گۆت: مفایێن بوونا ڤێ پرۆژێ تمام نابن، چونكی ب چەندان مفایێن جورە ب جور هەنە، ژ وان ژی پێدانا موچەیێن فەرمانبەرا ب شێوازەكێ رێك و پێك و كێمكرنا مەترسیا دزینا پاران و باشتربوونا رەوشەنبیریا دارایی و گەلەكێن دی ژی.
خویاژی كر، ژ بۆ ئێكم جار ژی نەخۆشخانا ئافرەت و دایكبۆنا هەولێری ب دیجیتاڵی شیان موچەیێن خو وەربگرن كۆ هەژمارا وان ٨٥٠ كارمەند بون ب رێكەكا زۆر ئاسان، دیسا ژی مەسرور بارزانی خویاكریە ئەڤ پرۆژە د ماوێ دو سالێن دیدا دێ ب دووماهی هێت و پێدانا موچەیێن هەمی فەرمانبەرا و خانەنشینان و هێزێن ئەمنیێن حوكمەتا هەرێمێ دهێنە ب دیجیتاڵی كرن.
