د پلانێ دایە دو سكرێن دی یێن ئاڤێ بهێنە دروستكرن
ئەڤرۆ
سالار محەمەد دۆسكی
رێڤەبەرێ سكرێن پارێزگەها دهۆكێ ئاشكرا كر، هاتنا بارانان رەوشا سكرێن پارێزگەها دهۆكێ باشتر لێكریە و ئاستێ ئاڤێ ب بەراورد دگەل پار سال بلند بوویە و گۆت: پلان و بەرنامێ رێڤەبەریێ ئەوە مفا ژ گشت ژێدەرێن ئاڤێ ل پارێزگەها دهۆك بهێتە وەرگرتن و بەردەوام سكرێن ئاڤێ بهێنە دروستكرن.
ئەندازیار فەرهاد محەمەد تاهر، رێڤەبەرێ سكرێن پارێزگەها دهۆكێ بۆ رۆژناما ئەڤرۆ گۆت: پشتی هاتنا بارانان رەوشا سكرێن پارێزگەها دهۆك بەر ب باشترە، چ د ئاستێ ڤەرێژا باران بارینان دا و چ ل ئاستێ سكرێن دا، سكرێ دهۆكێ مەترەك و ٤٦ سم بلند بوویە و نێزیكی 40% ئاڤ ل سكری دا هەیە، سكرێ خەنس دووەم مەزنترین سكرە ل پارێزگەها دهوكێ، ئەڤ سالە ل سەر بودجا حوكمەتا هەرێما كوردستانێ كابینا نەهێ هاتبوو تەمامكرن، پشتی هاتنا بارانان نێزیكی ٢٣ مەتران ئاستێ ئاڤێ بلند بوویە و چار ملیون و 400 مەترسێن سێجا ئاڤ هاتیە ئومباركرن و ئەڤە ئێك ژ پرۆژێن سەركەفتی بوویە، سكرێ كەشكان ل سنورێ باتێل ل قەزا سێمێل ئێك ژ سكرێن گرنگە بۆ كەرتێ چاندنێ و پێنچ مەتر و 70 سم ئاستێ ئاڤێ بلند بوویە.
زێدەتر گۆت: سكرێ بێدهێ ل سنورێ ناحیا ئامێدیێ هێشتا ژ كومپانیا جێبەجێكار نەهاتیە وەرگرتن ب شێوەكێ فەرمی و د ماوەیێ سەخبیركرنێ دایە و هندەك كێشێن تەكنیكی هەنە و ئەڤە بۆ ماوێ سالەكێ یە ئەم دووڤچوونێ دكەین دگەل كومپانیێ و رێڤەبەریا گشتی یا سكران و چەندین جارا مە سەرەدانا سكرێ ناڤبری كر كو ئەڤ چەندین سالە كار تێدا نەهاتیە كرن و د بزاڤێن هندێ داینە ڤان كێشا چارەسەر كەین دا بكەڤیتە د خزمەتا دەڤەرێ دا.
خویاژی كر، د ئەڤ سالەدا كار یێ دەسپێكری دو سكرێن دی دا، ئەو ژی سكرێ (گەلیێ بەنداوا) ل قەزا سێمێلێ، سكرێ (سپنە دو) دكەڤیتە بامەرنێ ل قەزا ئامێدیێ، پلانێن بەردەوام هەنە بۆ كوگەهكرنا ئاڤێ و بەرهنگاریا هشكە سالیێ و پلان هەنە سكرێن مەزن ل كوردستانێ بهێنە دروستكرن، دو سكرێن دی د پلان دانە بهێنە دروستكرن ل پارێزگەها دهۆك سكرێ (باكرمان و پاصێ) و دیسا سكرەكا هەفپشك دناڤبەرا سنورێن دهۆك و هەولێر بناڤێ سكرێ (مەنداوا) ئەڤە سكرێن هەرە مەزن بۆ كوگەهكرنا ئاڤێ و بەرهەمئینانا كارەبێ هەر دیسا پلان هەنە بو مفا وەرگرتنێ ژ ئاڤا ریبارێ خابووری ل سنورێ ئیدارا سەربەخویا زاخۆ.
رێڤەبەرێ سكرێ دهۆك گۆت ژی: ماوێ چەند سالان بوو چ بۆدجە بۆ سەخبێریكرنا سكرێ دهۆك نەهاتبوونە دابینكرن، ئەڤ سالە ب پشتەڤانیا كارگێریا پارێزگەها دهۆك و ل سەر فەرمانا سەرۆكێ حوكمەتێ جەنابێ (مەسرور بارزانی) 441 ملیون دینار بۆ سەخبێریا سكرێ دهۆك هاتنە تەرخانكرن و كومپانیەكێ دەست ب كارێ خوە كریە، هەردەم داخازیا مە ژ حوكمەتا هەرێما كوردستانێ ئەوە سەخبێریا بەردەوام و بودجەیێ پێدڤی بهێتە دابینكرن بو سكرێن كوردستانێ، چونكو سكر بەردەوام پێتڤی ب سەخبێركرنێ یە، دیسا سكرێن نوو پێدڤی ب میلاكی نە و پشتەڤانیا ئەنجوومەنێ وەزیران بۆ هەردو سكرێن (كەشكان و بێدهێ) هاتینە دابینكرن، چاڤەرینە میلاك بۆ سكرێ خەنس ژی بهێتە دابینكرن و هەتا نوكە ب فەرمی ژ كومپانیێ نەهاتیە وەرگرتن.
هێشتا گۆت: ل سالا بووری مە سەرەدانەك بۆ وەلاتێ ئەمریكا هەبوو وەك رێڤەبەرێن سكرێن كوردستانێ و مفایەكێ باش د وێ سەرەدانێ دا هەبوو، چونكە تەكنولوژیا ل جیهانێ گەلەك پێشكەفتی یە كت دێ چەوا شێین ل گەل وی ئاستی خوە گونجینین و ب تایبەت د بوراێ سلامەتیا سكری دا.
ل دور كێشان ژی، ئەندازیار فەرهاد گۆت: نەبوونا كومپانیێن تایبەتمەند دئاڤاكرنا سكرێن دا، ئاڤاكرنا سكرێ پێدڤی ب بۆدجێن بەردەوامن و نابیت دەمێ كار ل سەر پرۆژەكێ سكرێ دەسپێكەت بهێتە راوەستاندن هەتا تەمام دبیت و پرۆژێن سكرێ گرێدایی كەش و هەوایی نە و هەر سالەكا سەقا بهێتە گوهورین یان لەهی دروست بن كارتێكرنێن راستەوخو دكەت كارێ سكرێ و زەرەر و زیان ل بەر سكرێ دكەت، لەوما یا گرنگە هەر پرۆژەكێ سكرێ دەست ب كاربكەت پرۆژێ پێدڤی بەردەوام بۆ بهێتە مەزاختن هەتا تمام دبیت و پشتی تەمام بوونێ پێدڤی ب میلاكی و بودجێ كاركرنێ یە.
هێشتا گۆت: پلان و بەرنامێ مە هەیە و مفایی ژ هەموو ژێدرێن ئاڤێ وەربگرین وەك (كانیك، رووبار)، ب وێ مەرەمێ بشێن سكرێ ل سەر دروست بكەین و پلان هاتیەدانان ئەو رووبارێن ل سنورێ پارێزگەها دهۆكێ دا دەربازدبن مفایەكێ باش ژێ وەربگرین و هەر سكرەكێ بهێتە دروستكرن مە بزاڤكرینە ل گەل لایەنێن پەیوەندار چ ژ روویێ گەشت و گوزارێ یان وەبەرهێنانێ یان چاندنێ دا بیت، یان ئاڤێ و ئاڤداریێ دا بیت و مفا ژ سكرێ بهێتە وەرگرتن و دەرفەتێن كاری بهێتە دیتێن برێكا وان پرۆژا بۆ دەڤەرێ.
