بەرهەمێ خۆمالی یێ بۆ دەولەتان دهێتە رەوانەكرن بەر ب زێدەبوونێ یە
ئەڤرۆ
دهۆك، لەزگین جوقی:
شیرەتكارێ وەزارەتا چاندنێ و ژێدەرێن ئاڤێ ل حۆكمەتا هەرێما كوردستانێ بەحسێ پێشڤەچوونا بەرهەمێ خۆمالی دكەت و دبێژیت: د ڤان چار سالاندا بەرهەمێ خۆمالی یێ چاندنێ ب رێژا 8% ل هەرێما كوردستانێ زێدەبوویە.
كەریم سلێمان، شیرەتكارێ وەزارەتا چاندنێ و ژێدەرێن ئاڤێ ل حۆكمەتا هەرێما كوردستانێ بۆ ئەڤرۆ دیار كر:» نوكە هندەك بەرهەمێن چاندنێ هەنە گەلەك پێشكەفتن ل هەرێما كوردستانێ ئیناینە، وەكو بەرهەمێ پتاتان، ئەم یێ هەولددەین پشتەڤانیا وان جوتیاران بكەین، هەروەسا ژی نوكە بەرهەمێ هێك و مریشكێن خومالی ژی ل هەرێما كوردستانێ زێدە بوویە، ئەڤ بەرهەمە بۆ پارێزگەهێن عیراقێ دهێتە رەوانەكرن، ئەم یێ هەولددەین پتر پشتەڤانیا بەرهەمێ خۆمالی بهێتە كرن و بەرهەمێ خۆمالی یێ چاندنێ ب رێژا 8% ل هەرێما كوردستانێ زێدەبوویە، ب تایبەتی ژی د وارێ بەرهەمئینانا هێك و مریشك و بەرهەمێ گەنم شامی و پتات و هنار و گەنمی دا».
كەریم سلێمان گۆت: برنجێ ئاكرێ دهێتە رەوانەكرن بۆ دەولەتان و گەلەك جۆرین بەرهەمێ خۆمالی بۆ دەرڤەی وەلاتی دهێنە رەوانەكرن و بەردەوام حۆكمەتا هەرێما كوردستانێ پشتەڤانیێ دكەت و كێمترین ئەرد و كێمترین ئاڤ و زێدەترین بەرهەم هەبیت ئەنجامدەت».
ئاشكرا كر: ئەڤ سالە بەرهەمێ چاندنێ دێ گەلەك باش بیت، ب تایبەتی ژی بەرهەمێ گەنمی، چونكو رێژەكا باش یا بارانێ ئەڤ سالە هاتیە بەرهەمی و یێ باشە، ئەم یێ هەولددەین پرۆژێن ئاڤدانێ بۆ بەرهەمێ گەنمی بهێنە چێكرن و پرۆژە ئەو سایلو هەبن بۆ وەرگرتنا بەرهەمێ گەنمی و كارگەه ل گەل سایلۆیان بهێنە چێكرن، ئەو گەنمێ سایلو وەردگرن بكەنە ئار و دان و ساڤار و مەعكەرون و هەموو بەرهەمێ ژ گەنمێ دهێنە چێكرن ل سایلۆیان بهێنە بەرهەمئینان و بكەڤنە دناڤ بازارێ نافخۆ و بیانی دا، نوكە ل سایلۆیا هەولێر دەست بجهئینانا ڤێ پلانێ هاتیە كرن و ل دهۆك و سلێمانیێ ئەڤ پرۆژە هەیە و د قوناغێن بجهئینانێ دایە.
