دێ بزاڤێ كەین سیستەمێ كامیرێن پۆینت تۆ پۆینت بهێتە هەلوەشاندن
ئەڤرۆ
قائید میرۆ
سەرۆكێ لیژنا ناڤخۆ ل پەرلەمانێ كوردستانێ ئاشكراكر، ژلایێ لیژنەیەكا وەزارەتا ناڤخۆ سزا بۆ سیستەمێ نوو یێ كامیرەیێن تۆماركرنا لەزاتیا تڕۆمبێلان هاتیە دیاركرن و ئەگەر بزانین دێ ئەو سزایە بیتە بارگرانی ل سەر وەلاتیان، دێ ڤی سیستەمی هەلوەشینین و گۆت: نوكە ئەم كار دكەین بۆ ڤێ چەندێ سزایێ سیستەمێ نوو بهێتە كێمكرن، ب شێوەیەكی دگەل رەوشا ئابورا وەلاتیێن هەرێما كوردستانێ بگونجیت.
شاخەوان رەئوف بەگ، سەرۆكێ لیژنا ناڤخۆ ل پەرلەمانێ كوردستانێ بۆ رۆژناما ئەڤرۆ دیار كر «ئەو سزایێ نوكە هەی زۆرە و پێدڤیە بهێتە كێمكرن، چونكە كێمترین سزا ب ئەگەرێ زێدەگاڤیێ ژلایێ كامیرێن لەزاتیێ دهێتە تۆماركرن 70 هزار دینارن و ئەگەر بهێت و ب ڤی شێوەیێ نوكە هەی كامیرەیێن تۆماركرنا زێدەگاڤیێن تڕۆمبێلا بەردەوامبیت دێ سیستەم هێتە هەلوەشاندن، چونكو د شیانێن وەلاتیاندا نینە ڤی سزای بدەن.
زێدەتر گۆت: «ب دیتنا من دڤێت هەر سزایەكێ بهێتە بجهئینان دگەل رەوشا ئابوورا وەلاتیان بگونجیت و ژیانا وەلاتیان ل بەرچاف بهێتە وەرگرتن، ب تایبەتی كامیرەیێن سیستەمێ پۆینت تۆ پۆینت زێدەترە ژ كامیرەیێن دی، هەر سزایەكێ ژلایێ حوكمەتێ ڤە دهێتە دانان ل سەر شۆفێران پێدڤیە دگەل داهاتێ وەلاتیان بگونجیت، لیژنا ناڤخۆ ل پەرلەمانێ كوردستانێ دێ دووڤچوونا بابەتێ دانانا كامیرێن پۆینت تۆ پۆینت كەت و ئەركێ پەرلەمانێ كوردستانێ یە دووڤچوونێ بۆ بكەت و بزانیت هەتا چەند جهگیركرنا كامیرێن تۆماركرنا لەزاتیێ مفا هەیە ل سەر رەوشا هاتن و چوونێ و هەتا چەند ژی ئەو سزایە دێ بیتە بارگرانی ل سەر وەلاتیێن هەرێما كوردستانێ.
شاخەوان رەئوف بەگ ئاماژە كر» لیژنەیەكا تایبەت ل وەزارەتا ناڤخۆ ئەو سزایێ ژلایێ كامیرێن تۆماركرنا لەزاتیێ دانایە و رێڤەبەریێن گشتی یێن هاتن و چوونا پارێزگەهان ژی پشكداری ژ دیاركرنا سزایی كریە و ئەم نوكە یێ دگەل وەزارەتا ناڤخۆ هەماهەنگیێ دكەین وەك لیژنە بۆ كێمكرنا ئەو سزایێ ل سیستەمێ كامیرەیێن پۆینت تۆ پۆینت هاتیە دانان و دێ هەموو بزاڤەكێ بكەین بهێتە كێمكرن، ئەگەر هات و بزانین دێ زۆر ئاریشە بۆ وەلاتیان پەیدابن و د شیانێن وەلاتیان دا نینە ڤی سزایی بدەن ئەڤە لیژنا ناڤخۆ ل پەرلەمانێ كوردستانێ هەموو بزاڤەكێ بكەت ئەو سیستەمێ نوی یێ دانانا كامیرێن تۆماركرنا لەزاتیا تڕۆمبێلا بهێتە هەلوەشاندن، چونكو هەر سزایەكێ دهێتە دانان بێگومان بۆ ڤێ چەندێ یە سەرپێچی كێم ببن و شۆفێر پێگیریێ ب رێنمایی و بڕیارێن حوكمەتێ بكەن بۆ سلامەتیا وانە، بەلێ نابیت گوژمێ سزایی هند زۆربیت خەلك نەشێت بدەت.
