هژمارەكا گەنجان گوندەكێ چاندنێ ل ئاكرێ برێڤە دبەن
رەمەزان زەكەریا
گوندێ سپی مال ل سنوورێ دەڤەرداریا ئاكرێ، ئێكە ژ وان گوندێن ب ناڤ و بانك بۆ كەرتێ چاندنێ و هەتا هزار خانیێن پلاستیكی ل ڤی گوندەی هەنە و رۆژانە پشكا دوو پارێزگەها بەرهەمێ خۆمالی بەرهەم دئینن رەوانەی بازاران دكەن كو هەموو جۆرە كەسكاتیەك دهێتە چاندن.
تالب ئەحمەد، گەنجەكێ گوندێ سپی مالە ل سنوورێ ئاكرێ بۆ ئەڤرۆ گۆت: گوندێ سپی مال ب ناڤ و بانگە ب كەرتێ چاندنا ناڤ خانیێن پلاستیكی و نوكە ل گوندی هەتا هزار خانیێن پلاستیكی هەنە و كەرتێ چاندنێ ل ناڤ دا دهێتە كرن و هەموو خەلكێ گوندێ خانی هەنە چاندنا هەمە جۆر ل گوندی دهێتە بەرهەمئینان و هەر تشتێ رۆژانە پێدڤی بیت دهێتە چاندن بەرهەمەكێ پاكژ و ساخلەم ب ئاڤا پاكژ دهێتە ئاڤدان ئەو بەرهەمێ رۆژانە دهێتە رەوانەكرن بۆ پارێزگەهێن هەولێر و دهۆك و هەموو دەڤەرداریێن وێ.
ناڤبری گۆت ژی: نوكە رێژا پتریا جوتیاران بەرهەمێ خیارا چاندیە كۆ رێژا سێ لسەر ئێك خانیێن گوندی هەموو خیارن هەر دوو خانیا رۆژانە تەنەكا خیارا دهێتە بەرهەمئینان و بەلێ بهایێ وێ گەلەك یێ ئەرزانە كیلۆ ب 450 دینارا دهێتە فرۆتن دخوازین حوكمەتا هەرێما كوردستانێ رێگریێ ل خیارێ بیانی بكەت و نوكە بەرهەمێ مە گەهشتێ و ئەم رۆژانە خەرجیەكا زۆر لێ دكەین و ب ئەرزانی دفرۆشین بەرهەمێ ئیرانی زۆر كاریگەری یا هەی ل سەر بەرهەمێ مەیی نافخۆیی هەتا بەرهەمێ بیانی نەهێتە راگرتن بەرهەمێ جوتیارێن نافخۆیی دێ ب ئەرزانی هێتە فرۆتن.
ناڤهاتی ئاشكراكر : ل گوندێ سپی مال ژبلی بەرهەمێ خیارا رێژەكا باش بەرهەمێ باجان سوركا هاتیە چاندن و پێشبینی دهێتە كرن ئەڤ سالە رێژا بەرهەمێ ئێكجار زێدەببیت ئێكانە داخوازیا جوتیارێن گوندی ئەوە كو بەرهەمێ بیانی دەما پێگەهشتنا بەرهەمێ نافخۆیی بهێتە راگرتن ئەو باجان سوركا ل گوندێ سپی مال دهێتە بەرهەمئینان گەلەك یاباشە بۆ خوارنێ و كرین و فرۆتنەكا باش ل سەر هەیە ل كوردستانێ.
تالب گۆتژی: ئاریشا هەمبەر جوتیارێن گوندێ سپی مال ئەوە كۆ هەر چار وەرزێن سالێ كارێ چاندنێ دكەن بەلێ بهایێ وان دەرمان و پێدڤیێن چاندنێ گەلەك یێ گرانە بۆ نموونە كێمیا ب 140 هزارایە خەلكێ گوندی گرنگیەكا باش ب چاندنێ دایە و چەندین تەن كێمیا دڤێت ئەگەر بۆ جوتیارا بهێتە دابینكرن ب ئەرزانی دێ بیتە رێكخۆشكەرەك بۆ پتر گرنگی دان ب كەرتێ چاندنێ سەرەرای كو دخوازین حوكمەت دەمێ پێگەهشتنا بەرهەمێ نافخۆیێ جوتیاران ل كوردستانێ بەرهەمێ بیانی ئەوێن ب رێكا دەرگەهێن سنووری دهێتە نافخۆیا كوردستانێ راگریت بۆوێ چەندێ جوتیار مفاداربن ژ بەرهەمێ خۆ زەرەرنەگەهیتێ ئەگەر بەرهەمێ بیانی بەردەوام بهێت بهایێ بەرهەمێ نافخۆیی ل بازاری دێ كێم بیت و بڤێ چەندێ دێ زەرەر مەند بین.
