سەنتەرێ ژینەر هەتا نها زێدەتری سێ هزار گەنجان فێری كاری كرینە
ئەمیر ئەترووشی
خودانێ سەنتەرێ ژینەر ل پارێزگەها دهۆكێ راگەهاند، هەتا نوكە ل سەر ئاستێ هەرێما كوردستانێ سێ ژ مەزنترین پێشانگەهێن پەیداكرنا دەلیڤێن كاری رێكخستینە و ب رێكا وان پێشانگەهان ب سەدان گەنجان دەلیڤێن كاری بۆ خوە پەیداكرینە و گۆت: وەكو داتا هەتا سێ هزار و 527 گەنج فێری راهێنانێن پیشەیی كرینە و ل گۆرەی دووڤچوونا مە هەتا نوكە پتری 650 گەنجان ماینە سەر كاری و هێشتا د بەردەوامن د كاری دا.
ئاری عەبدولستار، خودانێ سەنتەرێ ژینەر ل پارێزگەها دهۆكێ د دیدارەكێ دا بۆ رۆژناما ئەڤرۆ دیار كر، ئەم وەكو سەنتەرێ ژینەری سەنتەرێ راهێنەریێ نە، بەردەوام خۆلێن پێگەهاندن و فێركرنێ بۆ پەیداكرنا دەلیڤێن كاری بۆ گەنجان ڤەدكەین، وەكو دروینگەهی و كارێن دەستی و سەرتراشی و پشتی وان فێر دكەین، پتریا وان ئەم دبەینە سەر كاری، بۆ نموونە گەلەك كۆمپانی یان رێكخراو یان كارگەهـ هەنە دەمێ پێدڤی ب كارمەندەكی دبن، ئەم هاریكاریێ دگەلدا دكەین و سیڤیێن وان گەنجێن مە فێری كاری كرین ددەینە وان و ب ڤێ رێیێ دەلیڤێن كاری پەیدا دبن.
ئاشكرا ژی كر كو پتریا وان كەسێن داخوازا كارمەندان ژ مە دكەن، رۆخسار و رێنمایێن و مەرجێن خوە دیار دكەن، ئەم ژی ل گۆرەی وان ناڤێن توماركری ل سەنتەرێ مە، گەنجان بۆ وان دەزگەهان دهنێرین و ددەینە كاری.
ئەو یەك ژی نە ڤەشارت كو ژ سالا 2015 وەرە سەنتەرێ وان هاتیە دامەزراندن و ل دەستپێكی ب تنێ وەكو راهێنانێن پیشەیی بوو و كەرتێ تایبەتە، ل سالا 2018 كەرتێ بكارخستنا كرێكارێن خۆمالی هاتە زێدەكرن و وەكو داتا هەتا سێ هزار و 527 گەنج فێری راهێنانێن پیشەیی كرینە و ل گۆرەی دووڤچوونا مە هەتا نوكە پتری 650 گەنجان ماینە سەر كاری و هێشتا د بەردەوامن د كاری دا.
ناڤبری ئاماژە دا هندێ كو وان ل سەنتەری تیمێ گەرۆك هەیە و كارێ وێ تیمی ئەوە ل كۆمپانی و كارگەهـ و رێكخراوان دگەرن بۆ هندێ دەمێ ئەو پێدڤی ب كارمەندان ببن ب رێكا سەنتەری گەنجان بۆ خوە ببەن و دەلیڤێن كاری بۆ وان گەنجان پەیدا ببن یێن سەنتەرێ ژینەر فێری كاری كرین و گۆت ژی: ئێك ژ مەزنترین پرۆژەیێن مە دگەل رێكخراوا GIZ یا ئەلمانی بوویە بۆ دیتنا دەلیڤێن كاری بۆ گەنجان.
دیار كر كو وان هەتا نوكە ل سەر ئاستێ هەرێما كوردستانێ سێ ژ مەزنترین پێشانگەهێن پەیداكرنا دەلیڤێن كاری رێكخستینە و ب رێكا وان پێشانگەهان ب سەدان گەنجان دەلیڤێن كاری بۆ خوە پەیداكرینە.
