موەلیدە بۆ دەمەكێ بەروەخت هاتبوونە دانان و هێشتا ژینگەهێ پیس دكەن
، سالار محەمەد دۆسكی:
رێڤەبەرێ فەرمانگەها ژینگەها دهۆك ئاشكرا كر، دانانا موەلیدان ل پارێزگەهێ رۆژ بۆ رۆژ د زێدەبوونێ دانە و ل دووڤ دووماهی ئامار هەتا نوكە 2000 موەلیدە ل پارێزگەهێ هاتینە دانان و ب تنێ چارەسەریا پاقژ راگرتنا ژینگەهێ راكرنا موەلیدانە و گۆت: موەلیدە نەهاتینە دروستكرن بۆ كارەبێ بەردەوام دروست بكەن، بەلكو هاتینە دروستكرن بۆ دەمەكێ گەلەك كێم، لەوما ژی گەلەك ئاریشەیان دروست دكەن.
دلشاد عەبدولرەحمان، رێڤەبەرێ فەرمانگەها ژینگەها دهۆك بۆ رۆژناما ئەڤرۆ گۆت: نەشێین بێژین پارێزگەها دهۆك هەموو یا پیسە، بەرۆڤاژی یا پاقژە، پێشتر مە هندەك جه هەبووینە كو پیشەسازی لێ بوو، دەڤەرا (كواشێ) هندەك پارزینگەهێن نەقانوونی ببوونە ئەگەرێ پیس بوونا ژینگەهێ، فەرمانگەها ژینگەهێ ب هەڤكاری ل گەل پارێزگەها دهۆك رۆژ بۆ رۆژ پلان هەنە ب مەرەما كێمتر زیانا ئەڤان پارزینگەهان و نوكە نێزیكی 11 پارزینگەهان ماینە و كار دكەن.
دلشادی ئەو ژی گۆت: پێشنیارا مە ئەوە هەر جهەكێ بیتە ئەگەرێ پیس بوونا ژینگەهێ ل پارێزگەهێ بهێتە راكرن، رۆژ بۆ رۆژ ئاڤێن دهێنە پیسكرن، چونكە سیستەمەكێ دروستێ سولینان مە نینە كو دووبارە بهێتە پارزینكرن و بزڤریتە د ناڤا ژێدەرێن ئاڤێ دا.
هێشتا گۆت: ئێك ژ پێكهاتێن سەرەكیێن ژینگەهێ هەوایە و ئێك ژ ئەگەرێن سەرەكیێن پیسبوونا هەوای موەلیدە نە و هژمارا وان گەلەكن و دناڤ هەمی تاخێن باژێری دانە و كونترۆل گەلەك یا ب زحمەتە و گەلەك موەلیدە سوتەمەنیێن پیس بكاردینن و نەیا ساخلەمە و دووبارە دهێتە پیسكرن و ئەڤە دبیتە ئەگەرێ پیسبوونا هەوایێ پارێزگەها دهۆك، چارەسەری ب تنێ ئەوە موەلیدە نەمینن و كارەبا گشتی ل وێستگەهان وەك وێستگەها كواشێ و گەلەك وێستگەهێن دی هەنە ل كوردستانێ كو ببنە ژێدەرێ سەرەكیێ وزێ بۆ كەهرەبا پارێزگەها دهۆكێ، موەلیدە نەهاتیە دروستكرن بۆ كارەبێ بەردەوام دروست بكەت بەلكو هاتیە دروستكرن بۆ دەمەكێ گەلەك كێم، لەوما ژی گەلەك ئاریشە دروست دكەن.
خویاژی كر، مە گەلەك ترۆمبێل هەنە و گەلەك دووكێلێ دكەن و ئەڤە پشتی سوتەمەنی یا پیس بۆ ترۆمبێلان ب كاردئینن و ب تایبەت ترۆمبێلێن ب گازوایلێ كارن دكەن و ئەو پتر ژینگەهێ پیس دكەن ژ ترۆمبێلێن پانزینێ و گرنگە دووڤچوون ل سەر كوالێتی یا سوتەمەنیێ بهێتەكرن، چونكە نە ب تنێ زیانەكا ئابووری یە، بەلكو زەرەرەكا ساخلەمی و ژینگەهی یە و ئەڤە ژ هەمی تشتی گرنگترە و گەلەك ترۆمبێل هەنە ماكینە ژ كار كەفتی نە و دروست ناكەن وەك ژینگەه بەردەوام ل سەر ڤان بابەتان كار دكەین، ل فەرمانگەهێن حكومی ل پارێزگەهێ و رێكخراوێن نەحكومی و ل دووڤ دووماهی ئامارێن فەرمانگەهێ هەتا 2000 موەلیدان ل پارێزگەها دهۆكێ هەنە و بەلاڤەكرینە و رۆژ بۆ رۆژ بەرەف زێدەبوونێ نە، چونكە تاخێن نوو دهێنە ئاڤاكرن.
رێڤەبەرێ فەرمانگەها ژینگەها دهۆك گۆت ژی: گەلەك بورج هەنە یێن هێلێن پەیوەندیانە و ل دووف رێنمایێن فەرمانگەها ژینگەها دهۆكێ دڤێت هندەك جهان بهێنەدانان ئەو جه زیانێ نە گەهینە وەلاتیان و بەردەوام دووڤچوون ل سەر دهێتەكرن و هەر كەسەكێ ل دووڤ رێنما نەبیت دهێتە قەدەغەكرن و نوكە رێنما هەنە و بودجە نابیت ل سەر بانێ (قوتابخانا، نەخوشخانا) هەر جهەكێ گرێدایی زارۆیان و هەمی جهێن هەستیار ئەم ناهێلین بهێنە دانان.
