كچەكا دهۆكێ دو میدالیێن برۆنزی د قارەمانیا عەرەبی دا ب دەستڤە ئینان
قەیس وەیس:
كچا باژێرێ دهۆكێ و یاریزانا هەلبژارتیا ئیراقێ بۆ یاریێن مەیدانێ ئەڤین سەعید دو میدالیێن برۆنزی د قارەمانیا عەرەبی دا ب دەستڤە ئینان، ئەوا هەڤڕكیێن وی دوهی ل سەر ئاستێ كوڕان و كچان ل باژێرێ مەراكش یا وەلاتێ مەغربێ ب پشكداریا 18 هەلبژارتیێن عەرەبی بۆ بەریكانێن جودا هاتینە كرن.
ئەڤین سەعید د بەریكانا 400م ئازاد رێزا سێیێ هات ب تۆماركرنا دەمێ 57 چڕكە و 13 پشك ژ چڕكەكێ، د یارییا 4*100 ئەڤینێ شیا دگەل هەرسێ هەڤالێن خوە كچێن هەرێمێ، رقیە جەمیل، كوردستان بەمۆ و دییە نزار رێزا سێیێ بهێن و میدالیا برۆنزی یا دویێ بۆ هەلبژارتیێ ئیراقێ تۆماربكەن.
ل سەر ئاستێ گشتی هەلبژارتیێ ئیراقێ بۆ كوڕان و كچان سێ میدالیێن برۆنزی و سێ یێن زیڤی ب دەستڤە ئینان كو یاریزانێن كور شیابوون د یاریێن خوەهاڤێـنا بلند و پارسەنگی و بەریكانێن 100م و بەریكانا دەكاتلۆن بینن و دەرئەنجامێ گشتی هەلبژارتیێ ئیراقێ ب شەش میدالیان رێزا 11ێ هات ئەوا هەلبژارتیێ مەغرەب ب20 میدالیان ناسناڤێ قارەمانیا عەرەبی یا یاریێن مەیدانێ ب دەستڤە ئینان.
