كار ل سەر زێدەكرنا رێژەیا وەرگرتنا گەنمێ جۆتیاران دهێتە كرن
دهۆك، لەزگین جوقی:
رێڤەبەرێ گشتی یێ چاندنێ ل پارێزگەها دهۆكێ دیار كر، بزاڤێن بەردەوام دهێنە كرن بۆ چارەسەركرنا ئاریشەیا وەرگرتنا گەنمێ جۆتیارێن پارێزگەها دهۆكێ و دبێژیت: چەندێن پێشنیاز بۆ حوكمەتا ئیراقێ هاتینە كرن، كو گەنمێ جۆتیاران وەربگریت.
ئەحمەد جەمیل، رێڤەبەرێ گشتی یێ چاندنێ ل پارێزگەها دهۆكێ بۆ ئەڤرۆ ئاشكرا كر، ل هەموو دەڤەرداری و ناوچەداریان لژنێن ڤەدیتنی هاتینە پێكئینان بۆ دەستنیشانكرنا رێژا گەنمێ جۆتیاران یێ نەهاتیە وەرگرتن و گۆت: «رێژەیا ئەو گەنمێ نەهاتیە وەرگرتن دێ هێتە دیاركرن و بۆ حوكمەتا ئیراقێ دی هێتە بلندكرن، داكو رێژا وەرگرتنا گەنمێ جۆتیاران بهێتە زێدەكرن، ب تایبەتی ژی بۆ ئەو لژنا ل بەغدا رێژا وەرگرتنا گەنمی ل پارێزگەهان زێدە دكەت، دیسا لژنا پەرلەمانێ ئیراقێ ژی دووڤچوونێ ل سەر رێژا گەنمێ جۆتیارێن دهۆكێ دكەت، مە پیشنیاز بۆ حوكمەتا ئیراقێ كریە پتر گەنمێ جۆتیاران بهێتە وەرگرتن».
ئەڤ سالە 100 هزار تەنێن گەنمی ژ جۆتیارێن دهۆكێ هاتینە وەرگرتن و پێشبینی دهێتە كرن بەرهەمێ گەنمی ئەڤ سالە بگەهیتە 382 هزار تەنان.
