ب گوژمێ پتر ژ ملیار دیناران پرۆژەێێن ئاڤێ دهێنە بجهئینان
رەمەزان زەكەریا
ل سنوورێ دەڤەرداریا ئاكرێ و ناوچەداری و گوندێن دەردوور ل وەرزێ هاڤینێ تووشی ئاریشا كێم ئاڤیێ دبن و حوكمەتێ ب كۆژمێ پتر ژ ملیار دیناران پرۆژێن ئاڤێ ئێخستینە د بوارێ بجهئینانێ دا.
ئەندازیار زرار ئەحمەد سلێمان، رێڤەبەرێ ئاڤا ئاكرێ بۆ ئەڤرۆ گۆت: حوكمەتا هەرێما كوردستانێ نوكە كۆژمێ ملیارەك و 121 ملیۆن دیناران تەرخانكرینە بۆ ئەنجامدانا هژمارەكا پرۆژێن ئاڤا ڤەخوارنێ ل سەنتەرێ ئاكرێ و ناوچەداریێن گردەسێن و بجیل و دینارتە و ئەو گوندێن ئاریشا كێم ئاڤیێ هەی، هەروەسا ب كۆژمێ 704 ملیۆن دیناران ژی پرۆژێن ئاڤێ د تەندەری دانە، ل دەمەكێ نێزیك دێ كەڤنە د وارێ بجهئینانێ دا، سەرەرای پرۆژێ گەرەكا سوسنا كۆ ب كۆژمێ 321 ملیۆن دیناران د قوناغا تەمام بوونێ دایە.
ناڤبری گۆت ژی: دوو بیرێن ئاڤێ دێ هێنە كولین ل گوندێ شەرمن و گسێ و تانك هێلا ڤەگۆهاستنا ئاڤێ بۆ گوندێ زنتا هێنە دانان دگەل چەندین پرۆژێن دی یێن ئاڤێ ل سنوورێ ناوچەداریا گردەسێن بجیل.
ئاشكراكر، هندەك پرۆژە دێ ژلایێ كۆمپانیا ڤە هێنە بجهئینان وەك كولانا بیرا گوندێ بەدریك و بیرا گوندێ دڕین شێخ و تۆرێن ئاڤێ ل گوندێ مام خەلیفە و بیرا پرۆژێ ئاكرێ گردەسێن، كولینا بیرا گوندێ كێلە بسمیران و كولینا بیرێ و تۆرا ئاڤێ ل گوندێ دڕەش ل سنوورێ ناوچەداریا گردەسێن.
ناڤهاتی گۆت: هژمارەكا بیرین دی هێنە كولین بیرەك ل گوندێ ماندیان ژوور هێتە كولین دگەل تۆرێن نافخۆیی و بیر كولین تۆرێن نافخۆیی ل گوندێ كێلە سینان و بیر كولین ل گەرەكا سوسنا و گەرەكا خرپە و تۆرێن نافخۆیی گەرەكا پیشەسازی و بیر كولان گەرەكا گولان و هەروەسا تۆرێن نافخۆیی بۆ سمیلان و بیركولین و تۆرێن نافخۆیی گەرەكێن شۆرش و خرگا.
ئەندازیار زرار گۆت: پرۆژەكێ دی هەیە ب كۆژمێ 704 ملیۆن دیناران بۆ چەندین پرۆژێن ئاڤێ و پەمپێن ئاڤێ بۆ دینارتە و مەزرینگان و ئامادا و شۆش و گۆرانككا كچكە، ئەو جهێن ڤی وەرزی دا ئاڤا كێم بیت ب تانكەران ئاڤ دێ بۆ هێتە دابینكرن و ڤەگۆهاستن.
ناڤبری خویاكر: ب رەنگەكێ گشتی ل وەرزێ هاڤینێ ئاریشا كێمیا ئاڤێ دروست دبیت، دەمێ مەسرور بارزانی سەرۆكێ حوكمەتا هەرێما كوردستانێ بۆ ئاكرێ گەلەك گرنگی ب تەمامبوونا پرۆژێ ستراتیژیێ ئاڤا ئاكرێ دا پرۆژێ ستراتیژیێ ئاڤا ئاكرێ بۆ دەمێ 25 سالا دێ ئاریشا كێمیا ئاڤێ چارەسەركەت ل سەنتەرێ ئاكرێ و ناوچەداریا بجیل و 18 گوندێن سەر رێیا پرۆژەی قەندیل ئاكرێ.
