بهایێ دۆلاری دێ هەر وەكی نوكە بلند مینیت
هەولێر، قائید میرۆ
بەرپرسەكێ بەرێ یێ حوكمەتا عێراقێ ئاماژە ب ڤێ وێ چەندێ دكەت، گەندەلیەكا زۆر ل بانكا ناڤەندی هەیە و ئەڤە ژی بوویە ئەگەرێ ڤێ چەندێ بهایێ دۆلار دانەكەڤیت و ئەز باوەرم دێ هەر وەكی نوكە بلند بمینیت. هەروەسا دبێژیت: بجهئینانا قانوونا بودجەی یا بێ ئاستەنگ نابیت بۆ هەرێما كوردستانێ و چەندین هووردەكاری تێدا هەنە.
د. فازل نەبی، بریكارێ بەرێ یێ وەزارەتا داراییا عێراقێ بۆ رۆژناما ئەڤرۆ دیار كر» هەر چەندە د ناڤا قانوونا بودجێ عێراقێ بهایێ دۆلاری دیاركریە كو هەر 100 دۆلار هەمبەری 130 هزار دینارێن عێراقی بهێنە گۆهۆڕین، بەلێ د دەمێ نوكە دا بهایێ دۆلاری د بازاڕێن عێراق و هەرێما كوردستانێ هەر وەكی خوە ب بلندی مایە و بەرۆڤاژی هێشتا بهایێ دۆلاری بلندترە ل سەر دەمێ بەری پەسەندكرنا قانوونا بودجەی، ب دیتنامن ئەگەرێن بلندیا بهایێ دۆلاری بۆ ڤێ چەندێ ڤەدگەڕیت گەندەلیەكا زۆر دهێتەكرن ل بانكا ناڤەندیا عێراقێ و هندەك كەسان ب دەلیڤە زانیە بازاڕێ دۆلاری بۆ خوە بكار بینن و قازانجەكێ زۆرێ رۆژانە ل گۆهۆڕینا دۆلاری بكەن.
زێدەتر گۆت: ئەڤە ژی بۆیە ئەگەر بهایێ دۆلاری ئەرزانتر نەبیت و بەرۆڤاژی مەترسیێن بلندبوونێ ژی هەنە، رۆژانە ژی ئەم دبینین بهایێ دۆلاری جار جار بلند دبیت، هەتا ئەو گەندەلیە ژی یا بەردەوامبیت سەرۆك وەزیرێن عیراقێ رێگریێ نەكەت و سنوورەكی بۆ گەندەلكاران نە دانیت، ئەڤە دێ رەوشا بازاڕێ دۆلاری ب ڤی شێوەی بەردەوامبیت و ئەگەرێن داكەتنێ زۆر دكێمن.
ناڤبری ئاماژە دا وێ چەندێ، ئەز ب خوە پێشبینی دكەم بهایێ دۆلاری هەر ب ڤی شێوەی ب بلندی بمینیت و دانەكەڤیت، چونكە ب زەحمەت دبینم بهایێ دۆلاری بگەهیتە ئەڤی بهایێ د ناڤا قانوونا بودجەی هاتیە پەسەندكرن، ئەڤە ژی دەرئەنجامێ وان گەندەلیانە یێن دهێنەكرن بۆ مفایێ هندەك كەسان و مللەت هەموو زەرەر مەند ببیت.
ل دۆر هاتنا پشكا هەرێما كوردستانێ دكتۆر فازل نەبی ئاماژە كر «هەر ل سەردەمێ دەنگدانێ ل سەر قانوونا بودجەی هەتا نوكە ژی ئەز یێ رژدم ل سەر بۆچوونا خوە ل دۆر پشكا هەرێما كوردستانێ د ناڤا قانوونا بودجێ عێراقێ، پشكا هەرێمێ یا بێ ئاستەنگ نینە و نابیت، لەوڕا ژی هووردەكاریێن زۆر د ناڤا قانوونا بودجەی هەنە بۆ هەرێما كوردستانێ و ئەز نابینم پشكا هەرێما كوردستانێ ب ساناهی بهێتە هنارتن، پێدڤیە هەرێما كوردستانێ ب هشیاری سەرەدەریێ ل گەل بەغدا بكەت، هەتا بێ ئاریشە پشكا هەرێمێ بهێتە هنارتن، مخابن هند هووردەكاری هەنە ب زەحمەتە بجهئینانا قانوونا بودجەی، ب تایبەتی ئەڤا گرێدایی هەرێما كوردستانێ، هەیە هەر چەندە ئەو رۆژ بۆرین، بەلێ خوزی ب شێوەیەكێ باشتر كار بۆ زامنكرنا پشكا هەرێما كوردستانێ بكەن.
