سێ تلفریك ل ئیدارا سەربەخۆیا زاخۆ دێ هێنە چێكرن
لەزگین جوقی
رێڤەبەرێ گشتیێ گەشت و گوزارَ ل ئیدارا سەربەخۆیا زاخۆ راگەهاند، كابینا نەهێ یا حوكمەتا هەرێما كوردستانێ هژمارەكا زۆر یا دەلیڤێن كاری بۆ گەنجان ب رێیا كەرتێ گەشت و گوزارێ بۆ خەلكێ زاخۆ پەیدابووینە، دێ هژمارەكا زۆر یا پرۆژەیێن گەشتیاری ل زاخۆ هێنە بجهئینان و دێ زاخۆ بیتە باژێرەكێ گەشتیاری».
چیا ئەمین، رێڤەبەرێ گشتیێ گەشت و گوزارێ ل ئیدارا سەربەخۆیا زاخۆ بۆ رۆژنامەیا ئەڤرۆ دیار كر: «حوكمەتا هەرێما كوردستانێ گەلەك گرنگیێ ب كەرتێ گەشت و گوزارێ ل زاخۆ دایە، نوكە چەندین پرۆژە یێ دهێنە بجهئینان، پشتی زاخۆ بوویە ئیدارا سەربەخۆ گەلەك رێڤەبەری بووینە رێڤەبەریێن گشتی و رەوشا زاخۆ گەلەك هاتیە گوهارتن، نوكە رەوشا گەشت و گوزارێ گەلەك باشبوویە و دەڤەرا زاخۆ یا گونجایە ببیتە باژێرەكێ گەشت و گوزارێ و هەبوونا ژێدەركێ وەكو رووبارێ خابیری ل زاخۆ ئێكە ژ خالێن بهێز كو زاخۆ ببیتە باژێرەكێ گەشتیاری و پلان هاتیە دانان زاخۆ ببیتە باژێرەكێ گەشتیاری، ئەم دێ د ماوەیەكێ كێمدا زاخۆ دەینە ناسكرن ب باشترین دەڤەرا گەشت و گوزارێ«.
ئاماژە دا وێ چەندێ ژی:» نڤیسارێن فەرمی ژلایێ ئیدارا سەربەخۆیا زاخۆ ڤە هاتینە بلندكرن بۆ وەزارەتا شارەوانی ل حوكمەتا هەرێما كوردستانێ كو دوو رێڤەبەریێن گەشت و گوزارێ ل زاخۆ بهێنە ڤەكرن، دێ رێڤەبەریا گەشت و گوزارا باتیفا و رێڤەبەریا گەشت و گوزارا رزگاری هێنە ڤەكرن، ئەڤە دگرنگن، ژ بەركو باتیفا ب خوە دەڤەرەكا گەشتیاری یە و سنۆری ناحیا رزگاری ژی كۆمەلگەها ئیبراهیم خەلیل و دەرگەهێ پیشابیری و ئێزدی و مەسیحی گەلەك ل وێ دەڤەرێ د ئاكنجیی نە، لەورا مە گرنگی پێ دایە و رێڤەبەریا گەشت و گوزارێ ل ناحیا رزگار ب سەر ئیدارا سەربەخۆیا زاخۆ ڤەكەن».
چیا ئەمین گۆت ژی:» پشتی دەستبكاربوونا كابینا نەهێ یا حوكمەتا هەرێما كوردستانێ گەلەك گرنگی ب كەرتێ گەشت و گوزارێ هاتیە دانان، ئەڤە بوویە ئەگەر ب هزارەها دەلیڤێن كاری بۆ گەنجان پەیداببن و هژمارەكا زۆر یا پرۆژان هاتینە بجهئینان و چەندین هاڤینگەهێن گەشتیاری هاتینە نووژەنكرن و جادەیێن جهێن گەشتیاری ژی دهێنە سەخبیریكرن».
تەكەستكر: ئێك ژ پرۆژەیێن گەلەك گرنگ پرۆژەیێ كورنیشی زاخۆیە، ئەڤە دێ د دەمەكێ نێزیكدا هێتە ڤەكرن و پرژۆەیێ گەلیێ زاخۆ ژی بەرەڤ قوناغێن دووماهیێ یە و پاركەكا نشتیمانیی یا گەشتیاری ل زاخۆ دهێتە دانان و پرۆژەیێ تەمامكرنا خابیرێ زاخۆ ژی هاتیە دانان و چەندێن پرۆژە د وارێ گەشت و گوزارێ دا ل زاخۆ دهێنە بجهئینان و چار ئوتێلێن پێنچ ستێر ل زاخۆ دهێنە ڤەكرن».
