دێ كەنگی مۆبایلا خوە گوهۆڕی؟
بێ گوهدانا ماركێ یان جورێ وێ یان ژی بهایێ وێ ل دەف تە، هەر تشتەكی دووماهیا خوە یا هەیی و دێ ژ ناڤ چیت، ب تایبەت مۆبایل كو بۆ ماوەكێ كورت هاتیە بەرهەمئینان، بەلێ ب گورەیی شارەزایان دڤێت ب كێمی سێ سالان بمینیتە ل گەل تە. ب بەهانەیا وێ چەندێ كو كۆمپانیێن بەرهەمئینەر ژی پشتی سێ سالان پشتەڤانیا وی ئامیری ناكەن ل گەل تە.
ئامیرێ مۆبایلێ بەردەوام دهێتە گوهۆڕین و ب تایبەت ژی ل وی دەمی، دەما ژ كار دكەڤیت یان نەخۆش دبیت یان ژی دشكێت و گەلەك ئەگەرێن دژی یێن هەین كو دبنە ئەگەرێ ژناڤچوونا ئامیرێ مۆبایلێ. ل ڤێرە دێ هندەك نیشانان ئێخینە بەرچاڤێن تە كو دێ بۆ تە پتر روون بیت كا ئایا دەم هاتیە ئامیرێ مۆبایلێ ب گوهۆڕی یان هێش یێ باشە.
1- پاتری:
تشتەكێ سرۆشتی و نورمالە ب بۆرینا دەمی ژیێ پاتریێ ژی كێم دبیت و ئێدی وەكو جاران نەشێت كار بكەت، دبیت ئەڤە ئاریشەكا مەزن نەبیت، بەلێ ب بورینا دەمی دێ گەلەك نەخۆش بیت زوو پڕ نابیت و زی هێتە خوار ژی.
• ل دەمێ بارگەكرنێ بكار نەئینە:
تشتێ كو دبیت هەتا رادەكی یێ ب زەحمەت بیت ئەوە كو تو نەشێی بۆ ماوەكێ درێژ مۆبایلێ بكار نەئینی یان هندەك جاران یێ ب تشتەكی ڤە مژیلی چ یاریی بیت یان هەر تشتەكێ دی و وەسان ل خوە دیار دكەیی كو یێ نەچاری بكاربینی ژ بەر ڤێ چەندێ ژی دێ بزاڤێ كەیێ ل دەمێ بارگەكرنێ ژی بكارئینی، ئەڤە ژی ئێك ژ ئەگەرێن سەرەكی یێن ژناڤچوونا پاتریێ نە.
• ب تەمامی پڕ نەكە ب هێلە 20% و 80% دا:
دبیت ئەڤە یا سەیر بیت هەتا رادەكی، بەلێ هەكە تە وەكر دێ پاتریا مۆبایلا تە بۆ دەمەكێ درێژتر مینیت
• گوهۆڕینا پاتریێ:
د خرابترین حالەت دا، هەكە تە بڤێت مۆبایلا خوە بگوهۆڕی، ژ ئەگەرێ لاوازیا پاتریێ، دشیان دایە ل وی دەمی پاتریێ ب گوهۆڕی ب ئێكا نوو، ئەڤە پاتریە هەكە بهێتە چاڤدان وەكو خالێن مە دیاركری، دبیت هەتا دو سالێن دژی ل دەف تە بمینیت و ب رەنگەكێ باش كارێ خوە بكەت.
2- شاشا مۆبایلێ:
شاشە د مۆبایلێن زیرەك دا ب هەموو تشت دهێتە هژمارتن ب تایبەت د سیستەمێ ئەندرۆید دا، ژ بەر گرانیا بهایێ وێ هەمبەر ئامیرێن دی.
گەلەك جاران ل دەمێ كەفتنێ ژ دەستی یان لێدانا تشتەكێ ب هێز یان ژی ژ بەر شورتەكێ كارەبێ یان ژی گەرماتیێ، شاشا مۆبایلێ ژ كار بكەڤیت، تو نەیێ ئامادەیی شاشەكا دی بدانیە سەر، ژ بەر كو مۆبایل هەتا رادەكی یا كەڤنە یان ژ بەر هەر ئەگەرەكێ دی، باشترە ل وی دەمی مۆبایلەكا دی ب كری، ژ بەر كو پتریا جاران شاشا مۆبایلێ بەرامبەر بهایێ ئێكا نوو یا وەكو وێ یە، یان ژی چ جوداهیەكا مەزن د ناڤبەرێ دا نینە.
3- عەمبارا مۆبایلێ:
بەردەوام مودێل و زنجیرێن نوو یێن مۆبایلان دهێن ل گەل ڤێ گوهۆڕینێ، گوهۆڕین د جهێ عەمباركرنا تشتان د ناڤ مۆبایلێ ژی دا دهێتە كرن، بۆ نمۆنە هەكە ل دەمەكی مە میموریەكا 16 مێگابایت هەبایە تشتەكێ گەلەك باش بوو، بەلێ نها مۆبایل یێن هاتین عەمبارا وان ئێك تێرایە و ژ نوو میموری ژی دكەڤیتێ. بەلێ ل گەل ڤێ پێشكەفتنێ ژی ئەپلیكەیشن و یاریی ژی پێش كەفتن و ئێدی جهی گەلەك زێدەتر ژ جاران دگرن و چەند ئابدەیتەك ژی دهێت گەلەك تشتێن نوو زێدە دبن و ئەڤە ژی دبیتە ئەگەر جهێ عەمبارێ یێ ڤالا كێم ببیت. ژ بەر هندێ ژی هەر دەما مۆبایلا مرۆڤی پڕ بوو، حەزا وی ژ ئامیرێ مۆبایلێ دشكێت.
4- ئابدەیت:
دەمێ مۆبایلا تە ئابدەیتێن نوو وەرنەگریت، ئەو ژی نیشانەكە كو دەمێ كرینا ئامیرەكێ مۆبایلێ یێ نوو یە.
دەمێ ئابدەیت نەهێن، تلەفۆن بەردەوام دێ سست و گیرۆ و خاڤ بیت، ژ بەر كو ئەپلیكەیشن پێدڤی ئابدەیتێ نە ل سەر سیستەمێ كەڤن كار ناكەن و سیستەم ژی نوو نابیت و دێ ژ تلەفۆنەكا كەڤن هێتە هژمارتن.
ب كورتی، مۆبایلان كوژیەكێ گرنگ ژ ژیانا مە یێ ب خوە ڤەگرتی و كارێ مە گەلەك یێ ب ساناهی كری، ژ بەر هندێ هەكە تو بزانی مۆبایلا تە بۆ تە بوویە سەر ئێش، باشترین چارە ئەوە خوە تۆش نەكەیی و بۆ خوە ل مۆبایلەكا نوو بگەری دا كو بشێی ئەو كارێن ژێ داخواز دكەیی بۆ تە بجه بیتیت.