د ڤان چوار سالێن بۆریدا نێزیكی 57 پرۆژەیێن پیشەسازی هاتینە بجهئینان
سولین سلێمان
كابینەیا نەهێ یا حوكمەتا هەرێما كوردستانێ هەر ژ دەستبكاربۆنا خۆ گرنگیەكا زۆر دایە كەرتێ پیشەسازی و بازرگانی، دا كو كوردستان ببیتە خودان زۆرترین پرۆژە و پیشەسازیا هەرێمی پێشكەڤیت.
فەتحی عەلی، راوێژكارێ وەزارەتا پیشەسازی و بازرگانیێ د دیدارەكێدا بۆ رۆژناما ئەڤرۆ گۆت: ئەگەر كارگەهـ زۆر ببن و پیشەسازی پشتەڤانی لێ بهێتە كرن، ئاستێ خوشگوزەرانیێ دێ بلندتر لێهێت.
ئاماژەكر” حوكمەتا هەرێما كوردستانێ د كابینەیا نەهێ دا بریاردایە وان ئالنگاریان كێم بكەت، ئەم وەكی نوونەرێن حوكمەتا هەرێمێ بزاڤان دكەین پیشەسازیا هەرێمی ببەینە ئاستێن جیهانی، جهێ شانازیێیە مە شیایە بەرهەمێن ناڤخۆ بهنێرینە رۆژهەلاتا ناڤین و وەلاتێن ئەوروپا، تاكو نۆكە وەزارەتا پیشەسازی و بازرگانیێ مۆلەت دایە ٤٣٥٠ كارگەهـ و خودان سەرمایان دا كو بشێن كارگەهان دامەزرینن، لێ ب كرداری ب تنێ نیڤ ژ وێ ژمارێ شیایە كاربكەن ئەوێن دی ژبەر ئەگەرێ دارایی و نەبوونا ئامیرەیان نەشیاینە بەردەوامیێ بدەنە كارێ خۆ.
ئاشكرا ژی كر ”هەر د ماوێ كابینا نەهێ یا حوكمەتا هەرێمێ نێزیكی 260 پرۆژە هاتینە پەسەند كرن و سەرمایا وان ١٤ ملیار دۆلار بووینە.
ژ لایەكێ دووڤە گۆت ”نۆكە ل هەرێما كوردستانێ دەستەیا وەبەرهینانێ دگەل وەزارەتا پیشەسازی و بازرگانیێ 11 ناڤچەیێن پیشەسازی دبن دەستدانە دا كو بهێنە دروستكرن پەرە پێ بهێتە دان، دیسان ژی ل پلانێن مە دا هەنە كۆ پێشكەفتنێ د بەرهەمئینانێدا بكەین، بۆ نموونە هەرێما كوردستانێ د ڤان سالێن بۆریدا نێزیكی ژ سەدێ ٩٥ هەمی بەروبومێن خارنێ ژ دەرڤە دئینان، لێ نۆكەدا ب خۆشحالیڤە كارگەهێن مە د زێدەبۆنێدانە و پێدڤیێن ناڤخۆ پردكەن، ئەڤ چەندە ژی فرەچەشنیە د داهاتێ هەرێما كوردستانێ.
نەوشیروان خودانێ كارگەها ئالین كۆ ئێكە ژ كارگەهێن هەری مەزن و ناڤودەنگ دوروبەرێ هەولێرێ بۆ رۆژناما ئەڤرۆ گۆت ”كارگەها مە ل سالا 2008 هاتیە دامەزراندن و رووبەرێ وێ ١٠ هزار مەتر دوجایە ، گۆت ژی “بەرهەمێن مە ل هەموو كوردستان و ئیراقێ دبەلاڤن و دهێنە فرۆتن و هەمی جۆرە بابەتێن بهارات و شرینیان دروستدكەین.
