كارتێكرنا كارەبا نەدروست ل سەر كۆمپیۆتەری
كەسەك ژ مە نینە ب سەری نەهات بیت، دەما ل سەر كۆمپیۆتەری كار دكەت و كارەب بچیت، هندەك ژ تشتێ بەرهەڤكری و نە سەیڤ كری ژ ناڤ چوو بیت، بەلێ تە جارەكێ هزرا خوە كریە، ژبلی ژناڤ چوونا ئەو بابەتێ تو ل سەر كار دكەیی چ دی ل كۆمپیۆتەری دهێت؟ یان ژی هەكە كارەب زێدەتر ژ ڤۆلیتیا خوە دهێت چەند كارتێكرنێ ل كۆمپیۆتەری دكەت؟
بەرسڤا ڤان پرسیاران و چەند پێزانینێن زێدەتر دێ ل ڤی بابەتی بۆ هەوە هێنە بەحسكرن.
– چوونا كارەبێ:
دەما كارەب دچیت، هێز ژ كۆمپۆتەری دهێتە بڕین ب ڤێ چەندێ ژی نەشێت كاركەت و د ڤەمریێت، ژ بەر هندێ ئەو دێكیۆمێنتا تو ل سەر كار دكەیی یان دێ ب ئێكجاری ژ ناڤ چیت و نامینیت یان ژی هندەك نامینیت و هندەك جاران ژی ڤەنابیت، ئاریشا زێدەتر بەرچاڤ ئەوە كو دێ هندەك كارێ تە ب ناڤێ دا چیت.
ژ بەر ڤێ چەندێ هەكە كو كارەكێ گرنگ ئەنجام ددەیی باشترە یان د رێكخستنێ دا، بكەیە ئوتو هەر زوو ب زوو بۆ تە سەیڤ كەت یان تو ب خوە ڤی كاری ئەنجام بدەیی.
– چاوان ئاریشا بڕینا كارەبێ چارە كەین:
هەكە هەردەم تە ئاریشا بڕینا كارەبێ هەیە، تشتەكێ گەلەك باش ئەوە كو تو ل شوونا ئامیرێ دێسك تۆپ، ئامیرێ لاپ تۆپ ب كاربینی ب تایبەت هەكە كارەبا دەڤەرا هەوە نەیا بنەجه بیت. ب ڤی رەنگی ل دەمێ كارەب دهێتە بڕین دێ ل سەر پاتریێ كار كەت و داتا و دێكیۆمێنتێن تە ژ ناڤ ناچن.
هەكە نەشیایی ڤێ چەندێ ئەنجام بدەیی ژ بەر ئەگەرێن دارایی بیت یان هەر ئەگەرەكێ دی، ل وی دەمی باشترە تو ئامیرەكێ یو پی ئێس بكری، وەكو پاتریەكا یەدەك كار دكەت، هەكە تو نەشێی كارێ خوە ژی ب دروستی ل سەر بكەیی دێ شێی كارێن خوە سەیف كەیی و كۆمپیۆتەری ب سلامەتی ڤەمرینی.
– كارەبا زێدە و ژ نشتەكێ ڤە:
گەلەك جاران ل دەمێ كارەب دچیت و دهێت، ل ڤەگەریانێ گەلەك ب هێز دهێت ئانكو ب ڤۆلتیەكا زێدەتر دهێت چ ژ ئەنجامێ هاتنوچوونا بەردەواما كارەبێ بیت یان بریسیەكێ یان هەر تشتەكێ دی.
هەر كەرەستەكێ كارەبایی ل مال رێژەكا دەستنیشانكری یا وەرگرتنا هێزێ یێ هەیی و نەشێت خوە ل بەر هێزەكا گەلەك زێدەتر بگریت، ئەڤجا هەكە ڤۆلتیا زێدەتر هات، خوە ل بەر ناگریت و هند دێ كار كەت هندی خوە ل بەر وێ هێزا زێدە دگریت و پاشان دبیت ژ ناڤ بچیت یان هەر تشتەكێ دی.
دەربارەیی ئامیرێ كۆمپیۆتەری ژی یێ تایبەت ب تە ڤە هەر دەما كارەب دگەهیتی دچیتە سەر سیستەمێ هێزێ كو دبێژنێ پاوەر ساپلایی، ئەڤجا هەكە زێدە ژ رادێ وێ گەهشتێ دبیت ببیتە ئەگەرێ ژناڤبرنا وی یان ژی هەر زیانەكا دی یا دگەهیتێ.
هەكە وەسان نەبیت و زێدەهی گەلەك بیت و ژ وێرێ ژی دەركەڤیت، دێ كەهیتە كەرستێن دی یێن ناڤا كۆمپیۆتەری و ل ڤێرە ئاریشێن مەزن روو ددەن، ژ بەر كو ئەو ئامیرێن ناڤا كۆمپیۆتەری خوە ل بەر ڤۆلیتیا زێدە ناگرن و ژ بەر هندێ ژی دبیت ئەو ئامیرێن ناڤا كۆمپیۆتەری ژناڤ بچن.
ژ بەر هندێ ژی كۆنترۆلكرنا ڤۆلتیا زێدە یا كارەبا مال كارەكێ گەلەك گرنگە ب تایبەت بۆ ئامیرێ كۆمپیۆتەری ژ بەر بهایێ وی یێ گران، هاتنا كارەبێ ب زێدەتر ژ رادێ وێ دبیت كۆمپیۆتەری ب ئێكجاری ژ ناڤ ببەت.
– چاوان دێ خوە ژ ڤێ ئاریشێ رزگار كەین:
هەكە باهۆزەكا ب هێز بهێت و بریسی ل گەل بن و تو هەست بكەیی كو ئەڤ بریسیە دبیت ب كێبلێ كارەبێ بكەڤن، باشترە هەموو تشتێ ئەلكترۆنی یێ ل مال ئەوێ ب كارەبێ كار دكەت ب ڤەمرینی یان كارەبێ ژێ ببڕی، ب ڤی رەنگی كارەب چەند زێدە بهێت زیانێ ناگەهینیتە ئامیرێن ناڤ مالێ و گەلەك گرنگیێ بدە ئامیرێ پاراستنا كەلوپەلان ژ كارەبێ.
هەكە تە ئەڤ كارە ئەنجام دان، پیرۆزە ئێدێ هەتا رادەكێ باش مەترسیا كارەبێ ل سەر كەرستێن تە یێن مال و ب تایبەت ژی كۆمپیۆتەری ب دووماهی هات و ئێدی كۆمپیۆتەرێ مال دێ یێ پاراستی بیت.