عەمار حەكیم داخوازا بجهئینانا ڕێككەفتنا شنگالێ و زڤڕاندنا ئاوارەیان دكەت
سەرۆكێ ڕەوتێ حیكمە یێ نیشتمانیێ ئیراقێ داخوازا بجهئینانا ڕێككەفتنا شنگالێ د ناڤبەرا هەردو حوكمەتێن ئیراقێ و هەرێما كوردستانێ دكەت و ب پێدڤی ژی دزانیت ئاوارەیێن ئێزدی بزڤرنەجهێن باب و باپیرێن خوە.
دوهی سێشەمبی 1/8/2023، عەمار حەكیم، سەرۆكێ ڕەوتێ حیكمە یێ نیشتمانیێ ئیراقی د ڕێوڕەسمێ سالڤەگەرا نەهێ یا كۆمكوژیا كوردێن ئێزدی ل بەغدا، د گۆتارەكێ دا گوت» نابیت ئێزدی ببنە قوربانیێن ململانێیێن سیاسی و چاڤەڕێی ڕێككەفتنا ئالیێن سیاسی بكەن بۆ وێ چەندێ بهێنە زڤراندن بۆ جهێن خوە یێن ڕەسەن.
عەمار حەكیم ب پێدڤی ژی دزانیا هەماهەنگیا زێدەتر د ناڤبەرا هەردو حوكمەتێن ئیراقێ و هەرێما كوردستانێ دا هەبیت بۆ بجهئینانا ڕێككەفتنا شنگالێ و زڤڕاندنا ئاوارەیێن ئێزدی بۆ دەڤەرێن وان و دوپاتكر ژی كو مافێ ئێزدیانە بزڤرڕن بۆ شنگالێ.
سەرۆكێ ڕەوتێ حیكمە یێ نیشتمانیێ ئیراقی دیاركر» پێدڤیە دەڤەرێن ئێزدیان ب تایبەت قەزا شنگالێ د زووترین دەمدا بهێنە نووژەنكرن و كێشەیا ئەمنی و كاریگەریێن وێ بهێنە چارەسەركرن و ڕێككەفتنا شنگالێ د ناڤبەرا هەردو حوكمەتێن ئیراقێ و هەرێما كوردستانێ دا بهێتە بجهئینان و ئاسانكاری بۆ زڤراندنا ئاوارەیان بهێتە كرن» .
ئەوژی بەرچاڤكر» پێدڤیە هەموو ئالی پێگیریێ ب ڕێككەفتنا شنگالێ بكەن، نەكو ئالیەك پشكەك ژ مادەیێن وێ بجهبینیت و پشكەكا دی پشت گوه بهاڤێژیت».
ئاشكراكر ژی» ئاستەنگێن ل بەردەم زڤراندنا ئێزدیان بۆ شنگالێ د سیاسی نە نەكو دارایی».
خویاكر ژی» ئێزدی بەری شەڕێ داعشێ ژ ئالیێ جڤاكێ نێڤدەولەتی ڤە د ناڤدار نەبوون، بەلێ ئەڤرۆ پشتی وان هەموو قوربانیێن مەزن یێن داین، ژ ئەگەرێ وێ ستەما ل وان هاتیە كرن و ئەو ئازارێن كێشاین، بووینە پێكهاتەیەكێ ناڤدار» .
ل ڕۆژا 9/10/2020، ڕێككەفتنا شنگالێ د ناڤبەرا هەردو حوكمەتێن ئیراقێ و هەرێما كوردستانێ دا ب چاڤدێریا مستەفا كازمی سەرۆك وەزیرێن ئیراقێ یێ بەرێ كو ژ شەش خالێن سەرەكی پێك دهێت ئەوژی هەلبژارتنا قایمقامەكێ نوو و بڕێڤەبرنا پرسا ئەمنی ژ ئالیێ حوكمەتا فیدرالی ڤە و دامەزراندنا دو هزار و 500 كەسان ژ خەلكێ شنگالێ و ئاوارەیێن وێ و دروستكرنا هێزەكا نوو و ب دوماهئینان ب PKK و هەموو وان گرۆپێن پەیوەندێ پێ هەی و نابیت هیچ كەسێ ب سەر PKK ڤە ل وان هێزێن ئەمنی یێن نوو بهێتە دامەزراندن و بەغدا و هەولێر هەماهەنگیێ بۆ ئاڤەدانكرنا شنگالێ و بڕێڤەبرنا وێ بكەن.
