ل ئاكرێ ساڵانە رێژەیا بەرهەمئینانا سماقێ زێدە دبیت
رەمەزان زەكەریا
ل پرانیا دەڤەرێن كوردستانێ سماق دهێتە چاندن، ل دەڤەرەكێ بو دەڤەرەكا دی رێژا وێ پترە، ل سنورێ قەزا ئاكرێ رێژەكا بەرفرەها رەزێن سماقێ هاتینە دانان و سالانە ژیان و ژیارا خەلكی ل سەر بەرهەمێ سماقێ یە.
رزگار زەكەریا، رەزڤانەكێ دەڤەرا ئاكرێیە بۆ ئەڤرۆ گۆت: ئەم گەلەك گرنگیێ ب بەرهەمێن خومالی ددەین، ب تایبەت چاندنا سماقێ كو بەرهەمەكێ خورسكیە و ژیارا گەلەك كەسان ل سەر فروتنا وێ یە، سالانە ل دەستپێكا مەها هەشت دەست ب چنینا وێ دكەین، ژ بەر كو گەلەك سماق دكەڤیتە د ناڤ بازاری دا و ناچیتە دەرڤە ژی، لەوما ژی ئەزران دبیت، ئەڤ سالە گەلەك زێدە بوویە، بەرهەمێ سماقێ هێشتا بهایێ وێ دیار نینە، بەلێ پێشبینی دهێتە كرن جوتیار ب بەرهەمێ خۆ دلخۆش و مفادارببن.
گۆت ژی: ل دەسپێكا بوهارێ دەست ب چاندنا شتلێن سماقی دكەین و هەتا سێ سالان دگەهیتە بەری، سالانە ژی كەزاخێ بۆ دكەین و دیسا ژی هند سالان خراب دبیت و نەخوشیەك بۆ دهێت، ئەگەر چو نەخوشی بۆ نەهێن، پشتی سێ سالان ئەم دەست ب چنینێ دكەین، دەڤەرا مە تایبەتمەند و ب ناڤ و بانگە بۆ سماقێ، ئەگەر بهێتە فروتن ب بهایەكێ باش هندەك مال هەنە كارێ وان سماق چنینە و چو كارێن دی ناكەن، ژ بەر كو دەڤەرا مە ئاخەك و هەوایەكێ باش هەیە بۆ چاندنا سماقێ.
فازل مستەفا رێڤەبەرێ چاندنا ئاكرێ بۆ ئەڤرۆ گۆت: ئەڤ سالە هەمبەر پارسال بەرهەمێ سماقێ زێدە بوویە، ل دەڤەرا ئاكرێ نوكە 3 ملیۆن و 500 دارێن سماقێ هەنە، ئەڤسالە پێشبینیا 5 هزارو 250 تەنا دكەین و رووبەرێ 8 هزار و 750 دۆنەما ئەرد ب سماقێ هاتیە چاندن.
گۆتژی: سماق ئێكە ژ وان بەرهەمێن جوتیارێن دەڤەرێ گەلەك گرنگی پێدای، ئەڤ بەرهەمە دچیتە دەرڤەی كوردستانێ و ل نافخۆ ژی خواستەكا باش ل سەر هەیە، كارگەها ئاریاس ل ئاكرێ سماقا دەڤەرێ ب هێرایی و ب ساخی دبەتە دەرڤەی كوردستانێ.
