سۆتنا دارستانان كارتێكرنا راستەوخۆ ل سەر پیسبوونا ژینگەهێ هەیە
بێوار حسێن زێباری
سۆتنا دارستانان زیان نە ب تنێ دگەهیتە جهێ ئاگر بەربوویێ، بەلكو دەمێ ئەڤ زەڤییە دسۆژیت كارتێكرن ل سەر هەموو دەوروبەری خوە دكەت، تشتی زیندی بیت یان نە زیندی و رێژا بیابانێ ل وی دەمیدا ئێكسەر بەرەڤ بلند بوونێ و زۆریێ دچیت و كەسكاتی و داروبار ژی ل وی جهی كێم دبیت.
حازم عەلی; چالاكڤانێ ژینگەهێ بۆ روژناما ئەڤرۆ گۆت: سۆتنا دارستانان كارتێكرنا راستەوخۆ ل سەر پیسبوون و تێكچوونا هەڤسەنگیا ژینگەهێ هەیە، ژ ناڤچوونا دارستانان دبیتە ئەگەرێ كێمبوونا رێژا كەسكاتی و هەر ئاخا دار تێدا نەمان ب ساناهی تووشی دارمانێ دبیت، ئێدی هێدی هێدی بیابان بوون زێدە دبیت و هەروەسا پلێن گەرمێ ژ وان دەڤەرێن بێ كەسكاتی ب ئاوایەكی هەستپێكری بلند دبن.
گۆت ژی; ژبلی ڤێ چەندێ سۆتنا دارستان و پوش و پەلاخا دبیتە ئەگەرێ دروستبوونا گازا دوانا ئۆكسیدی كاربۆن د بەرگێ هەوایدا كو گازەكا مەترسیدارە ل سەر تەندروستی و ژیانا زیندەوەران.
هەروەسا حازم ئەشكرا كر ژی كو ب ئەگەرێ سۆتنێ چەندین زیندەوەرێن سود بەخشێ دناڤ ئاخێ ژناڤ دچن، ئەو ئاخ پیتبوونا خۆ ژ دەست دەدەت و بەرهەمەكێ باش لێ بەرهەم ناهێت و هەروسا گەلەك رووەكێن وێ ئاخێ ب ئەگەرێ سۆتنێ ژناڤ دچن.
چالاكڤانێ ژینگەهێ حازم عەلی ئەو یەك ژی دیار كر، بێگومان كارتێكرنا سۆتنێ دبیتە ئەگەرەكێ سەرەكیێ تێكچوونا هەڤسەنگیا ژینگەهێ و هەردەما نە هەڤسەنگا ژینگەهێ ژی دروست بوو، مرۆڤ و ئاژەل و رووەك تووشی نەخۆشیێ و ژ ناڤچوونێ دبن.
