ل دهۆكێ 126 كارگەهێن ساركەرێن فێقی هەنە
بەرپرسێ پشكا پلاندانان و دووڤچوونێ ل ڕێڤەبەریا گشتی یا چاندنێ ل پارێزگەها دهۆكێ دیار كر، پارێزگەها دهۆكێ ل سەر ئاستێ ئیراقێ یا ئێكێ یە بۆ هەبوونا هەژمارەكا زۆر یا كارگەهێن ساركەرێن عمباركرنا فێقی، كو نێزیكی 126 كارگەهێن ساركەر هەنە، پتریا وان ژی ل دەڤەرا شێخان و بەردەڕەش هاتینە دانان.
خدر دێوالی، بەرپرسێ پشكا پلاندانان و دووڤچوونێ ئاشكرا ژی كر، هەر كارگەهەكا ساركەر شیان هەنە دەهـ هزار تەنان هەتا ملیۆن تەنێن بەرهەمان عمبار بكەت.
ناڤهاتی گۆت: «ژ بەر زۆریا بەرهەمان و نەشارەزایا جۆتیار و خودانێن كارگەهان، هەتا نوكە فێقی نەهاتیە عمباركرن، ب تنێ پتات دهێنە عمباركرن، هەروەسا سێ هەتا شەش مەهان پتات د ڤان كارگەهێن ساركەردا دمینن و خراب نابن».
