ئەڤ سالە مۆهلەت ب 33 پڕۆژەیێن وەبەرهێنانێ هاتیەدان
رێڤەبەرێ راگەهاندنا دەستەیا وەبەرهێنانێ ئاشكرا كر، ئەڤ سالە دەستەیا وەبەرهێنانێ مۆهلەت دایە 33 پڕۆژەیێن كەرتێ وەبەرهێنانێ و دبێژیت: نوكە زێدەتر مۆهلەت بۆ پڕۆژەیێن پیشەسازی و بازرگانی و چاندنێ دهێنەدان نەك یێن ئاكنجیبوونێ.
بەرگەشت ئاكرەیی، رێڤەبەرێ راگەهاندنا دەستەیا گشتیا وەبەرهێنانێ بۆ رۆژناما ئەڤرۆ دیار كر، ئەڤ سالە دەستەیا وەبەرهێنانێ مۆهلەت دایە 33 پڕۆژەیێن وەبەرهێنانێ، ژ وان ژی: هەشت پڕۆژەیێن كەرتێ بارزگانینە و دو پڕۆژە یێن ساخلەمیێ و 11 پڕۆژەیێن كەرتێ پیشەسازی یێن دی ژی د بیاڤێ گەشتیاری و پەروەردە و چاندنێ دانە و گۆت: «سەرجەمێ پڕۆژەیێن سەردەمێ كابینا نەهێ مۆهلەت وەرگرتی هەژمارا وان 277 پڕۆژەنە و هاتینە بجهئینان».
بەرگەشت ئاكرەیی گۆتژی: «ئەو پڕۆژەیێن ژ لایێ دەستەیا گشتیا وەبەرهێنانێ مۆهلەت وەرگرتی سەرمایێ وان زێدەتری 894 ملیۆن دۆلاران بوویە، هەموو ئەو پڕۆژە ل سەر رووبەرێ هزار و 673 دۆنەمێن ئەردی هاتینە بجهئینان».
زێدەتر گۆت: «سیاسەتا حوكمەتا هەرێما كوردستانێ د كەرتێ وەبەرهێنانێ دا هاتیە گوهۆڕین و نوكە زێدەتر گرنگی ب پڕۆژەیێن پیشەسازی و بازرگانی و چاندنێ دهێتەدان نەك پڕۆژەیێن ئاكنجیبوونێ».
