ئەڤ سالە 50%ێ بەرهەمێ تری دێ ژ سالا بۆری كێمتر بیت
ئەڤرۆ، زنار تۆڤی:
د. ئەمجەد عوبەید گەڤەركی، رێڤەبەرێ باخداری ل پارێزگەها دهۆكێ بۆ رۆژناما ئەڤرۆ دیار كر، ئەڤ سالە بەرهەمێ تری ل پارێزگەها دهۆكێ هەڤبەركرن ل گەل سالا بۆری گەلەك كێمترە و د هەمان دەم دا ئەڤ سالە 50%ێ بەرهەمێ تری دێ ژ سالا بۆری كێمتر بیت، ئەڤ چەندە ژی ڤەدگەریت بۆ هاتنا بارانێن درەنگ و ئەو سەرمایا ل دووماهیا بهارا ئەڤ سالە هاتی، وەكرییە بەرهەمێ تری یێ كێم بیت.
ناڤهاتی گۆت: «ل سالا بۆری 60 هزار تەنێن تری ل پارێزگەها دهۆكێ هاتبوونە بەرهەمئینان و ئەڤ سالە ئەو رێژە ب نیڤی بوویە و 30 هزار تەنێن تری دێ هێنە بەرهەمئینان، ئەڤ رێژە ژی تێرا خوارنا ناڤخوەیی هەیە، ل گەل هندێ ژی دڤێت ئێدی جۆتیار كوالێتیا بەرهەمێن خوە باش بكەن، داكو بەرهەمێ وان باش ل بازاری بچیت».
گوتژی: «نوكە نێزیكی 125 جۆڕێن تری ل پارێزگەها دهۆكێ هەنە و پتری 50 تۆخمان ژ وان ل پێشانگەهان دهێنە نیشادان و ئەو جۆرێن تری ژی پتر ل بازاری دچن و خەلك پتر حەز ژ وان جۆران دكەن، دیسا ئەڤ سالە سێڤێن بەرواریا دێ بۆ دەرڤەی وەلاتی هێنە هنارتن و ب ڤی رەنگی دێ جۆتیارێن وێ دەڤەرێ مفادار بن و ئێدی دێ بازار ژی بۆ بەرهەمێ وان پەیدا بیت».
