نێزیكی 700 هزار ئاژەل ل ئاكرێ دهێنە بخودانكرن
رێڤەبەرێ چاندنا ئاكرێ دیار كر، ل سنورێ قەزا ئاكرێ نێزیكی 700 هزار سەرێن ئاژەلێن بچووك و مەزن هەنە و رۆژانە ل دەڤەرا ئاكرێ هەتا 60 تەنێن شیرێ خومالی ل سەرجەمێ ڤان ئاژەلان دهێتە بەرهەمئینان.
فازل مستەفا رێڤەبەرێ چاندنێ ل ئاكرێ بۆ رۆژناما ئەڤرۆ خویاكر، ل سنورێ قەزا ئاكرێ نێزیكی 700 هزار سەرێن ئاژەلی لێ هەنە كو سەرجەمێ گشتی یێ ئاژەلی ل پارێزگەها دهۆكی قەزا ئاكرێ پتری 40%ێ مەر و مالاتێ پارێزگەها دهۆكێ دكەڤیتە سنورێ قەزا ئاكرێ.
رێڤەبەرێ چاندنا ئاكرێ زێدەتر خویاكر، ئەو مەرومالاتێ ل ئاكرێ دهێتە ب خودانكرن پتری 600 هزار سەران مەرومالاتێ بچووكە وەكو مەر و بزن و پتری 40 هزار سەرێن مەزن ل ئاژەلێن دی وەكو (گولك و چێل) بخۆڤە دگریت، ئەڤ ئامارە ژی یا بلندە و ئاكرێ دەڤەرەكا زەنگینە ژی ب خودانكرنا تەرش و تەوالی.
فازل مستەفا زێدەتر دبێژیت: رێژەیا بەرهەمئینانا شیری ل سنورێ قەزا ئاكرێ ل سەرجەمێ گشتی یێ ڤان ئاژەلان رۆژانە دگەهیتە پتری 60 تەنێن شیرێ خومالی بەشەك ل وی شیرێ خومالی بۆ دەڤەرێن جودایێن كوردستانێ دهێتە رەوانەكرن.
