ب گوژمێ 600 ملیون دیناران تووتن ل شنگالێ هاتیە چاندن
دووڤچوون:
هەر چەندە ئەڤ سالە بەرهەمێ تووتنێ ل دەڤەرا شنگالێ كێمبوویە، بەلێ ل گەل هندێ ژی نێزیكێ 40 جوتیار هەنە و بەرهەمێ وان دگەهیتە نێزیكێ 600 ملیون دیناران. جوتیارەكی خواست كارگەهێن داگرتن و چێكرنا جگارا ل دەڤەرێ بهێنە چێكرن و گۆت ژی: ئەگەر كارگەهـ ل دەڤەرێ بهێنە چێكرن و پشتەڤانیا جوتیاران بهێتەكرن، دێ بەرهەمئینانا تووتنێ ل شنگالێ زۆر زێدە بیت و هزاران گەنج و وەلاتی ژی بكاركەڤن.
ئەلیاس قەیرانی، ئێك ژ وان جوتیارایە كو رێژەیەكا تووتنێ چاندیە بۆ ئەڤڕۆ گۆت: دەڤەرا شنگالێ ئێك ژ وان دەڤەرێن كوردستانێ یە كو ئاخا وێ ب كێر چاندنێ دهێت، د نوكە دا چەندین جورێن چاندن و دەرامەتی هاتینە چاندن و خەلك پێڤە مژوول بوویە وداهاتەك ژی بۆ وان دهێت و خێزانێن خوە د ژین.
زێدەتر گۆت: ئەڤ سالە نێزیكێ 40 جوتیاران دەست ب چاندنا تووتنێ كریە، وەكو دیارە تووتنا دەڤەرا شنگالێ ل بەر ئاڤا سار و شیرین دهێتە چاندن و ب سروشتی دهێتە بەرهمئینان بێی كۆ مادەیێن كێمیای تێدا بهێنە بكارئینان، هەر چەندە ئەڤ سالە ژ ئەگەرێ كەشوهەوایی و كێمبونا ئاڤێ بەرهەمێ تووتنێ كێم بوویە، بەلێ ئەڤ سالە نێزیكێ 20 تەنێن تووتنێ ژلایێ جوتیاران هاتیە بەرهەمئینان.
ناڤبری دیار كر ژی كو تووتن ب دوو جورا دهێتە فڕوتن و گۆت ژی: جۆرێ ئێكێ ب شێوەیێ بەلگ دهێتە فروتن كو كیلویا وێ نێزیكێ 20 هزار دیناراییە، شێوەیێ دویێ ب شیوەیێ هشك و ڤاڤارتی دهێتە فروتن كو كیلویا وێ نێزیكێ 40 هزار دینارایە، ب گشتی بەرهەمێ ئەڤ سالە نێزیكێ 600 ملیون دینارایە، ئەڤ یەك ژی تا رادەیەكێ باشە و داهاتەك بۆ خەلكی پێڤە دهێت.
پرانیا بەرهەمێ تووتنا شنگالێ هەر ل شنگال و دەوروبەر دهێتە فروتن، تامەكا خوش و جیاواز هەیە و رەنگێ و جوانە، ب باشترین تووتنا عەرەبی دهێتە هژمارتن، بەلێ هەتا نوكە نەهاتیە رەوانەكرن بۆ دەرڤە و باشور و نافەراستا عیراقێ، ئەوی جوتیاری هوسا گۆت.
جوتیارێ ناڤبری خواست كارگەهێن داگرتن و چێكرنا جگارا ل دەڤەرێ بهێنە چێكرن و گۆت ژی: ئەگەر كارگەهـ ل دەڤەرێ بهێنە چێكرن و پشتەڤانیا جوتیاران بهێتەكرن، دێ بەرهەمئینانا تووتنێ ل شنگالێ زۆر زێدە بیت و هزاران گەنج و وەلاتی ژی بكاركەڤن.
پشتی سالا 2014ێ و هاتنا داعش بۆ دەڤەرێ، بەرهەمێ چاندنێ ل دەڤەرێ چنە بوو، ڤان دوو سێ سالێن بوری، هندەك ژ ئاوارەیان ڤەگەریانە و دەست ب چاندنێ كریە، بەلێ رەوشا ئەمنی و گورانكاریێن كەشوهەوایی كارتێكرن ل سەر پێشڤەچوونا چاندنێ كریە.
