ئەڤ سالە 90% ێ بەرهەمێ مێشێن هنگڤینی كێم بوویە
زنار تۆڤی:
ل پارێزگەها دهۆكێ سالانە رێژەكا باش یا هنگڤینی ژ لایێ مێشەڤانان ڤە دهێتە بەرهەمئینان، هەر چەندە ل وەرزێ بهارا ئەڤ سالە ژ ئەگەرێ هاتنا سەرمایەكێ و نەمانا كولیلكێ و دیسان ژ ئەگەرێ گەرمێ ل روەرزێ هاڤینێ، بەرهەمێ هنگڤینی گەلەك كێم بوویە و ڤێ چەندێ كارتێكرنەكا خراب كرییە، سەر بەرهەمێ مێشێن هنگڤینی.
سەلام محەمەد پیرۆ، مێشەڤانەكە بۆ رۆژناما ئەڤرۆ دبێژیت: ئەڤە 14 سالە ئەو كارێ ب خودانكرنا مێشێن هنگڤینی دكەت ل دەڤەرا بەرواری بالا، ل سالێن دەستپێكێ یێن ب خودانكرنا مێشان وی گەلەك حەزمەت پێڤە دبر، هەتا گەهشتییە ڤێ قۆناغا نوكە، مێشێ ب سەخبێری و شارەزایی پێ دڤێت، هەتا مرۆڤ دشێت بەرهەمەكێ باش ژێ بەرهەم بینیت، هەروەسا ئەڤ سالە رەوشا مێشێن هنگڤینی یا باش نینە، وەكو سالا بۆری، چونكی ل وەرزێ بهارێ و ل دەمێ چێبوونا كولیلكا گیایی و داروباری، بەفر ل دەڤەرا بەرواری بالا باری، سەرمایێ كولیلكا داروباری و گیایی خراب كر، ڤێ چەندێ كارتێكرن ل سەر میشێن مە كر، لەوما ئەڤ سالە بەرهەمێ هێنگیڤی گەلەك كێمترە ژ سالا 2022 ێ، هەروەسا ل سالا بوری، من 130 مێشێن هنگیڤی هەبوون، من نێزیكی 900 كیلۆیێن هنگڤینی ژ وان مێشان كرن، ئەڤ سالە من نێزیكی 200 مێشان هەنە، ل دۆرێن 400 كیلۆیێن هنگڤینی من ژێ كرینە.
ناڤهاتی گۆت ژی: ئەز هنگڤینێ خۆ ب مەرج دفرۆشم، ئەڤ سالە كیلۆیەكا هنگڤینی دناڤبەرا ( 65 – 75) هزار دیناران د فرۆشم، هەروەسا مە وەكو مێشەڤان ژی پەیوەندی یێن باش ل گەل ئێك هەنە، ئەم مفایی ژ سەربورێن ئێكودۆ د وارێ ب خودانكرنا مێشان دا وەردگرین، هەتا نوكە بارزارێ فرۆتنا هنگڤینی یی باشە و ئەم شییانە هەتا رادەكێ باش ئەو هنگڤینێ مە هەیی بفرۆشین.
مریەم عەلی، مێشەڤانەكا دیترە بۆ رۆژناما ئەڤرۆ دبێژیت: پەیداكرنا دەلیڤێن كاری یا ب زەحمەت بوو، هەر چەندە كارێ ب خودانكرنا مێشێن هنگڤینی كارەكێ ب زەحمەتە، بەلێ من ئەو كارە هەلبژارت، ئەڤە 10 سالە كارێ ب خودانكرنا میشان دكەت و ل دەستپێكی چار مێش ب خودانكرن، هەروەسا ئەڤ سالە سەقا گەلەك یێ گەرم بوو، ڤێ چەندێ كارتێكرنەكا خراب كرییە سەر مێشێن هنگڤینی، هەروەسا كارێ ب خودانكرنا مێشان بۆ من كارەكێ ب ساناهییە، نوكە من 180 مێشێن هنگڤینی هەنە و ئەز ب رەنگەكێ باش سەخبێرییا وان دكەم.
حەجی عەباس مەسیحا، مێشەڤانەكە ل گوندێ خالشێ، بۆ رۆژناما ئەڤرۆ گۆت: مە دو پرۆژێن مێشێن هنگڤینی هەنە، ئێكێ ژ وان ل گوندێ هرۆرێ یە و ئێك ژی ل بەر رووبارێ خابیری یە ل گوندێ خالشێ، ئەڤە 23 سالایە ئەز كارێ ب خودانكرنا مێشێن هنگڤینی دكەم، ئەڤ سالە 90% ێ بەرهەمێ مێشێن هنگڤینی كێم بوویە، ل سالا بوری بەرهەمێ هنگیڤی ل دەڤەرا بەرواری بالا و گولیان گەلەك یێ باش بوو، بەلێ ئەڤ سالە بەروڤاژی بوویە، چونكی ل دووماهییا وەرزێ بهارێ دا گەلەك باران بارین و چەندین جاران توز باری، ل دەمێ چێبوونا كولیلكێ ژی گەلەك باران بارین و كولیلك شویشت و شریناهی پێڤە نەما، لەوما مێش نەشییا هنگڤینی چێكەت.
ناڤهاتی گۆت ژی: ئەڤ سالە مە 240 مێشێن هنگڤینی ل گوندێ هرۆرێ هەنە، دیسا 250 مێش ژی مە ل گوندێ خالش هەنە، ئەڤ سالە ژ سەرجەمێ 240 مێشێن ل هرۆرێ مە 140 كیلۆیێن هنگڤینی ژێڤە كرینە، ئەو هنگڤین ژی یێ بێ سەروبەرە، هەروەسا ل وەرزێ بهارێ ل گوندان ستری زەركەك چێدبیت، كولیلكا وی هەموو یا زەرە، دەمێ مێشا هنگڤینی وێ گولێ دكەتە هنگڤین تاما وی هنگڤینی یا تەحلە، ل دەستپێكێ مرۆڤ نەشێت وی هنگڤینی بخۆت، بەلێ پشتی هنگێ ئەو تەحلاتی هند نامینیت، خەلكێ مە حەز ژ وی هنگڤینی دكەت، ئەڤ سالە بازارێ هنگڤینی وەكو پێدڤی نینە، هەروەسا د نوكە دا هنگڤین ژ وەلاتێن دەوروبەرێن مە دهێتە كوردستانێ، ڤێ چەندێ كارتێكرنەكا نەباش كرییە سەر هنگڤینێ خۆمالی.
