٤٠ جۆتیاران ب گوژمێ 600 ملیۆن دیناران تووتن چاندیە
هەر چەندە ئەڤ سالە بەرهەمێ تووتنێ ل دەڤەرا شنگالێ كێمبوویە، لێ د گەل هندێ ژی نێزیكی 40 جۆتیاران تووتن چاندیە و بەرهەمێ وان دگەهیتە نێزیكی 600 ملیۆن دیناران.
ئەلیاس قەیرانی، ئێك ژ وان جۆتیارایە، كو تووتن چاندیە بۆ ئەڤڕۆ نیوز گۆت: «ئەڤ سالە مە نێزیكی 40 جۆتیاران دەست ب چاندنا تووتنێ كریە، وەكو دیارە تووتنا دەڤەرا شنگالێ ل بەر ئاڤا سار و شرین دهێتە چاندن و ب سروشتی دهێتە بەرهەمئینان بێكو ماددەیێن كێمیایی تێدا بهێنە بكارئینان، هەر چەندە ئەڤ سالە ژ ئەگەرێ سەقای و كێمبوونا ئاڤێ بەرهەمێ تووتنێ كێم بوویە، بەلێ ئەڤ سالە نێزیكی 20 تەنێن تووتنێ هاتینە بەرهەمئینان».
ناڤبری دیاركر ژی كو تووتن ب دو رێیا دهێتە فڕۆتن و گۆتژی: «رێیا ئێكێ ب شێوەیێ بەلگ دهێتە فرۆتن كو كیلویا وێ ب نێزیكی 20 هزار دینارایە، رێیا دویێ ب شیوەیێ هشك و ڤاڤارتنێ دهێتە فرۆتن، كو كیلویا وێ نێزیكێ 40 هزار دینارایە، ب گشتی بەرهەمێ ئەڤ سالە نێزیكی 600 ملیۆن دینارایە، ئەڤ یەك ژی هەتا رادەیەكی باشە و داهاتەك بۆ خەلكی پێڤە دهێت».
قەیرانی خویا ژی كر، پرانیا بەرهەمێ تووتنا شنگالێ هەر ل شنگالێ و دەوروبەران دهێتە فرۆتن، تامەكا خوش و جیاواز هەیە و رەنگێ وێ یێ جوانە، ب باشترین تووتنا عەرەبی دهێتە هەژمارتن، بەلێ هەتا نوكە نەهاتیە رەوانەكرن بۆ دەرڤە و باشوور و ناڤەراستا ئیراقێ.
جۆتیارێ ناڤبری خواست كو كارگەهێن داگرتن و چێكرنا جگاران ل دەڤەرێ بهێنە چێكرن و گۆت: «هەكە كارگەهـ ل دەڤەرێ بهێنە چێكرن و پشتەڤانیا جۆتیاران بهێتە كرن، دێ بەرهەمئینانا تووتنێ ل شنگالێ زۆر زێدە بیت و هزاران گەنج و وەلاتی ژی بكاركەڤن».
