قەرەكێ 150 ملیۆن دیناری بۆ پڕۆژەیێن بچووك و ناڤنجی دێ هێتە مەزاختن
هەولێر، قائید میرۆ:
وەزیرا كار و كاروبارێن جڤاكی ل حوكمەتا هەرێما كوردستانێ ئاشكرا كر، پڕۆژەیێ گەشانەوە پشتەڤانیا پڕۆژەیێن بچووك و ناڤنجی دكەت و هەر كەسەكێ مەرجێن پێدڤی ل نك هەبن دشێت ژ قەڕێ حوكمەتێ مفادار بیت و هەتا 150 ملیۆن دیناران وەكو قەڕ دێ بۆ هێنە مەزاختن.
كویستان محەمەد، وەزیرا كار و كاروبارێن جڤاكی بۆ رۆژناما ئەڤرۆ دیار كر، پڕۆژەیێ گەشانەوە ژ لایێ سەرۆكێ حوكمەتا هەرێما كوردستانێ ڤە هاتیە راگەهاندن و گۆت: «مەرەم ژ پڕۆژەیێ گەشانەوە پشتەڤانیكرنە ل پڕۆژەیێن بچووك و ناڤنجی، هەتا ژ لایێ دارایی ڤە پشتەڤانی و هاریكاریا وان كەسان بهێتە كرن یێن پڕۆژە هەین، د چارچوڤێ پڕۆژەیێ گەشانەوە دا، هەركەسەكێ پڕۆژەیەك هەبیت یان كۆمپانیا و كارگەهەك هەبیت ژ بەر شیانێن ماددی نەشێت كار بكەت، ئەڤە دێ قەرەك ژ لایێ حوكمەتێ ڤە ب ئەڤان پڕۆژەییان هێتەدان، هەتا بشێن دەست ب كاری بكەن و خوە ل سەر پێن خوە بگرن».
كویستان محەمەد گۆتژی: «قەڕێ دهێتە بەلاڤكرن ل سەر پڕۆژەیێن بچووك و ناڤنجی هەتا 150 ملیۆن دینارانە و هەر پڕۆژەیەكێ مەرجێن پێدڤی تێدا هەبن دشێت ژ هاریكاریێن حوكمەتێ مفادار بیت، ژ لایێ سەرۆكایەتیا جڤاتا وەزیران سەرپەرشتیا ئەڤی قەڕی دهێتە كرن و هاریكاریەكا باشە بۆ كەسێن شیانێن كاری هەین و بابەتێ دارایی رێگرە ل هەمبەر كاركرنێ».
