پشتی دامەزراندنا بانكا نیشتیمانی دێ پێشینە ل سەر وەلاتیان هێنە بەلاڤكرن
هەولێر، قائید میرۆ
رێڤەبەرێ گشتیێ بانكێن بازرگانی ئاشكراكر، دامەزراندنا بانكا نیشتیمانی ل هەرێما كوردستانێ ژ چەندین لایان ڤە مفا بۆ هەرێما كوردستانێ هەنە و ئێكەم كۆمپانیا كەرتێ گشتیە دهێتە دامەزراندن بۆ خزمەتا بیاڤێ دارایی. هەروەسا دبێژیت: هەر ئەركەكێ بانكێن رەشید و رافیدەین ل عێراقێ ئەنجامددەن بانكا نیشتیمانی ژی هەمان دەستهەلات هەنە، ژ وان ژی بەلاڤكرنا پێشینەیان ل سەر وەلاتیان.
مەولود سابیر، رێڤەبەرێ گشتیێ بانكێن بازرگانی بۆ رۆژناما ئەڤرۆ دیار كر» رێكارێن دامەزراندنا بانكا نیشتیمانی ل هەرێما كوردستانێ بەر ب دووماهیێ دچن و ل سەر داخوازا بانكا ناڤەندیا عێراقێ بانكا نیشتیمانی ل هەرێما كوردستانێ دهێتە دامەزراندن، ئەڤە ژی دبیتە ئێكەم كۆمپانیا كەرتێ گشتی ل هەرێما كوردستانێ بهێتە ڤەكرن و دێ كاریگەریێن خوە هەبن.
زێدەتر دبێژیت: پشتی رێكارێن ڤەكرنا بانكا ب دووماهی دهێن، دێ ژلایێ بانكا ناڤەندی بڕیار ل سەر هێتەدان و ب فەرمی ژی بانكا نیشتیمانی بهێتە راگەهاندن ل هەرێما كوردستانێ، د ئێكەم كۆمبوونا بانكا ناڤەندی دێ بڕیارا دامەزراندنا بانكا نیشتیمانی بهێتە پەسەندكرن، هەر كارەكێ ژلایێ بانكا رەشید و رافیدەین ل عێراقێ بهێتە ئەنجامدان و ب رێڤەبرن، ئەڤە بێگومان دێ بانكا نیشتیمانی ژی هەمان كار و دەستهەلات هەبن، چونكە تنێ كارێ بانكا نیشتیمانی بەلاڤكرنا مووچێ فەرمانبەران نابیت، بەرۆڤاژی بەلاڤكرنا مووچەی تنێ ئێكە ژ وان ئەركێن بانكا نیشتیمانی و هەر پارەیەكێ ل دەرڤەی هەرێما كوردستانێ بهێت بۆ ناڤا كوردستانێ بۆ بەلاڤكرنا مووچێ فەرمانبەران دێ ب رێیا بانكا نیشتیمانی بیت.
خویاژی كر، هەموو پارەیێن دی ژی یێن ل دەرڤە دهێنە هەرێما كوردستانێ، دێ هێنە بانكا نیشتیمانی، ئەز ب باوەرم دامەزراندنا ڤێ بانكێ ژ چەندین لایان ڤە دێ مفا بۆ هەرێما كوردستانێ هەبیت، چونكە هەر وەكی ل دەستپێكێ من ئاماژەكری، ئێكەم كۆمپانیا كەرتێ گشتیە دهێتە دامەزراندن و بەری نوكە ب تنێ كۆمپانی و بانكێن ئەهلی هەبوون بۆ ڤێ مەرەمێ.
رێڤەبەرێ گشتیێ بانكێن بازرگانی گۆت ژی» ئێك ژ ئەركێن بانكا نیشتیمانی دێ بەلاڤكرنا پێشینەیان بیت ل سەر وەلاتیان، چەندین سالە هژمارەك پێشینە ژلایێ بانكا ناڤەندیا عێراقێ ل سەر وەلاتیێن عێراقێ دهێنە بەلاڤكرن و وەلاتیێن هەرێما كوردستانێ بێ بەهر بووینە، بەلێ پشتی دامەزراندنا بانكا نیشتیمانی هەر پێشینەیەك ل عێراقێ بهێتە بەلاڤكرن دێ ژلایێ بانكا نیشتیمانی ژی بهێتە بەلاڤكرن و وەلاتیێن هەرێما كوردستانێ دێ مفاداربن، هەروەسا بۆ چەندین مەرەمێن دی یێن دارایی دێ ئەو بانكە هێتە بكار ئینان و ئەو ڤالاهیا بەری نوكە ل هەرێما كوردستانێ هەی ب ئەگەرێ نەبوونا ڤێ بانكێ دێ هێتە چارەسەركرن و ئەنجام ژی دێ دیار بن بۆ خەلكی پشتی بانكا نیشتیمانی دكەڤیتە كاری.
