بەرهەمێ بەڕوویان ل هندەك دەڤەران بەر ب زێدەبوونێ یە
رەمەزان زەكەریا
دار بەروو دارەكا خورسكیە ل دەڤەرێن چیایی شوون دبیت، پرانیا گوندنشینا بۆ بەرهەمێ ئاژەلداریێ بەرهەمێ بەروویا كۆم دكەن و ل وەرزێ زڤستانێ وەك خوارنا دووێ بۆ پەزی ب كاردئینن.
محەمەد عەبدوڵا، ئاژەڵدارەكێ دەڤەرا ئاكرێیە بۆ ئەڤرۆ گۆت: داربەروو بەرهەمەكێ زۆر هەیە ل كوردستانێ و ل پرانیا دەڤەرێن چیایی ژی هەیە، ژیێ وێ دناڤبەرا 500 بۆ 1000 هزار ساڵا دمینیت و چەندین جۆرێن بەروویا هەنە، بلنداهیا وێ ل سەر جهی و دەڤەرێ دمینیت و هندەك دار بەرو هەتا 4 مەترا بلند دبن و ل وەرزێ پایزێ ل گەل دارێن دی بەلگێن خوە د وەرینن.
گۆتژی: سالانە ئەم بەرهەمێ بەروویا كۆمدكەین بۆ خوارنێ و بۆ كەرتێ ئاژەڵداریێ ل كوردستانێ چەند جۆر هەنە، ب تنێ جۆرێ قەهوائی بۆ خوارنێ و ئاژەلداریێ كوم دكەین.
ئاشكراكر: ئەم بەروویا كۆمدكەین وەك خارنا دوویێ بۆ كەرتێ ئاژەلداریێ، واتە ئەو دەمێ بەفر و بارانێن ب هێز دهێن و نەشێن دەربێخین، ب رۆژ بەروویا ددەینە پەزی و ب شەڤ ئالیكێ وان یێ دروست ددەینی و بۆ خوارنێ ژی گەلەك دخون، تایبەت ل وەرزێ زڤستانێ ساڵانە چەندین تەنا بۆ كەرتێ ئاژەلداریێ كۆم دكەین.
تاهر ساڵح چالاكڤانێ ژینگەهێ ل كوردستانێ بۆ ئەڤرۆ گۆت: ل كوردستانێ مە دووڤچوونەكا گشتی كریە ل گۆر ئەنجامێن دووڤچونێن مە دیاربوویە ل سنورێ پارێزگەها دهوكێ ل ئامێدێی و ئاكرێ و بەروویەكا باش هەیە ل چەندین دەڤەرێن سۆران ژی هەنە.
گۆتژی: وەرگرتنا ئامارا دروست دەمەكێ زۆر دڤێت، لەورا ئەڤە چەندین ساڵە ئەم كار ل سەر ئامارا دروستا بەرهەمێ بەروویا دكەین. ب گشتی ل كوردستانێ ل وان دەڤەرێن دیاركری پتر بەروو بۆ بەرهەمێ ئاژەلداریێ دهێنە كۆمكرن.
خویاكر: كرین و فروتن هەر دناڤبەرا خودان ئاژەڵ و مەرا دارا دهێتە كرن، ل هەموو كوردستانێ ساڵانە هەتا 700 تەنێن بەروویا دهێنە كۆمكرن، ل چیایێن كوردستانێ ژی ئەڤ سالە رێژا بەرهەمێ بەروویا گەلەك یا باشە.
