هەر دۆنەمەكا ئەردی دو تەنێن برنجێ كوردی بەرهەم دئینیت
ئامێدیێ، مەحمود نهێلی:
بەرپرسێ هۆبا چاندنێ ل دێرەلۆكێ دیاركر: باران و شهێ و سەرمایێ كارتێكرن ل سەر دەرامەتێ ب گشتی كریە و گۆت: ل سنورێ هوبا چاندنا دێرەلۆك پتر ژ 1500 دونەمێن ئەردی ب كێر چاندنا برنجی دهێن و ئەڤ سالە 500 دونەمێن ئەردی بۆ برنجی هاتینە چاندن و هەكە هەر دونەمەكێ 1500 كێلویێن برنجی بەرهەم بینیت و هەر ئێك كیلو ب 2500 دیناران بهێتە فرۆتن، ئەڤە بەرهەمێ ئەڤ سالە ب تنێ دێ بیتە بهایێ نێزیكی دو ملیار دیناران.
ئەندازیار عسمەت ئیبراهیم، بەرپرسێ هۆبا چاندنێ ل دێرەلۆكێ بۆ رۆژناما ئەڤرۆ گۆت: ژبەركو ل دووماهیا بهارا ئەڤ سالە بارانێن زۆر بارین و سەرمایەكا دژوار كەفتە ئەردی و ژ بەر وێ یەكێ شهـ زێدەبوو و ڤێ یەكێ ژی كارتێكرن كرە سەر دەرامەتێ ب گشتی و تایبەت ژی داروباری و كونجیان و برنجی.
ناڤهاتی دیار ژی كر، بارینا بارانێن زوو یێن ئەڤ سالە پایزێ ژی كارتێكرن كریە سەر بەرهەمێ برنجێ ل سنورێ ناوچەداریا وان و بوویە ئەگەرێ وێ یەكێ كێمتر بەرهەمی بدەت و گۆت: (دگەل وێ یەكێ چاندنا برنجی زەحمەت و رەنجەكا پتر ژ دەرامەتێن دیتر دڤێت، لێ مفایێن برنجێ كوردی باشترن ژ گەلەك وان برنجێن دهێنە هاوردەكرن و ژ لایێ تام و خوەشیێ ڤە ژی ژ هەموو جۆرێن دیتر باشترە و چاندنا وی قازانجەكا باش تێدا هەیە بۆ جوتیاران و هەروەسا زەڤیێن چاندنێ ژی دهێنە پاقژكرن).
ئاشكرا كر: هەر دوونەمەكا ئەردی ئەگەر ب رەنگەكێ باش بهێتە كرن، دێ دورێن دو تەنێن برنجی بەرهەم ئینیت و نوكە برنجێ كوردی ژی ل بازاری باشتر ژ یێ بیانی دهێـتە فرۆتن زێدەبار وێ یەكێ ب دەست خەلكی ناكەڤیت.
ناڤهاتی ئەو یەك ژی تەكەستكر: ئەو ل دووڤ شیانێن خوە بەردەوام هاریكاریا جوتیاری دكەن بۆ هەر كارەكێ چاندنێ ئەو ئەنجام بدەن و گۆت: (ئەو كەسێ ب كارێ چاندنا برنجی رابیت ئەم دێ ل دووڤ شیانێن خوە هاریكاربین دگەل دا و هەر دەمەكی پێدڤی ب مە هەبیت دێ چینە پێش و دێ بۆ ئێش و نەخوەشیێن تووشی برنجێ وی ژی دبن چارەسەركەین و ئەگەر چ نەبیت بۆ بكەین دێ رێنمایان پێشكێشی جوتیاری كەین، ب تایبەت ژلایێ شیرەتكاریا چاندنێ ڤە).
دیار ژی كر، ل سنورێ هوبا چاندنا دێرەلۆك پتر ژ 1500 دونەمێن ئەردی ب كێر چاندنا برنجی دهێن و ئەڤ سالە 500 دونەمێن ئەردی بۆ برنجی هاتینە چاندن و هەكە هەر دونەمەكی 1500 كێلویێن برنجی بەرهەم بینت و هەر ئێك كیلو ب 2500 دیناران بهێتە فرۆتن، ئەڤە بەرهەمێ ئەڤ سالە ب تنێ دێ بیتە بهایێ نێزیكی دو ملیار دیناران.
