بهایێ دۆلاری هندی وێڤەترە بلندتر لێ دهێت
هەر چەندە حوكمەتا ئیراقێ ب چەندین سوزانو بریاران گۆتینە بهایێ دولاری دێ ل 130 هزاران جێگیر بكەت، لێ ڤی بریارێ گەلەك جیاوازی دگەل بهایێ دولارێن بازاری هەیە ب شێوازەكی كۆ بهایێ دولاری نۆكەدا ل دەوروبەری ١٦٠ هزار دیناران كرین و فرۆتن پێ دهێتەكرن.
د. ئدریس رەمەزان پسپۆرێ ئابووری و مامۆستایێ زانكۆیێ بۆ رۆژناما ئەڤرۆ راگەهاند، ئاریشا دولاری ب ئیراقێ ناهێتە چارەكرن، ئەگەرێن وێ ژی ژ بۆ وان ئاریشێن دناڤبەرا ئەمریكا و ئیرانێنە، ژ بەر ڤێ چەندێ ژی ب تنێ خەلكەكێ هەژار تێدا زەرەرمەند دبن.
خویاكر؛ ئەڤ ئاریشە زەحمەتە ب دووماهی بهێت، چونكی هەتا بانكا ناڤەندییا ئیراقێ ژی شیانێن كۆنترۆكرنا ڤێ چەندێ نینن، بهایێ دۆلاری ژی هەر ب ڤی بهایێ بلند دێ مینیت و هەتا بلندتر ژی دێ لێ هێت.
ئاماژەكر، وەكی ئەم یا نۆكە دبینین ئەمریكا ب رێكا دولاریڤە پێداگریێ ل حوكمەتا ئیراقێ دكەت، چونكی ئاریشە یا ل كەرتێ دارایی یا حوكمەتا ئیراقێ هەی، لەوما بها ژی ل بازاران نەیێ جێگیرە. ژ لایەكێ دووڤە ژی، د نۆكە دا بانكا ناڤەندی دۆلاری ب شێوازەكێ كێم بازاری دا ددانیت.
محەمەد خۆشناو كارێ وی كرین و فرۆتنا هەمی جۆرێن پارایە بۆ رۆژناما ئەڤرۆ گۆت: گوهۆرین ب سەر دولاری ب دەمژمێران دهێتە گوهۆرین، وەكی دبینین ژی هەر یا بلندتر لێ دهێت، هەر چەند ئێراق بزاڤا بكەت بهایێ دیناری بەرامبەر دولاری بلند لێ بكەت، دیسا یا سەركەفتی نابیت و هەر دولار بلندتر دبیت، هەر چەند بازارێ مە ژی نەهند یێ باشە و خەلك ژبەر گرانیا بهایێ دولاری نۆكە پارێن خۆ ناكەنە دولار، چونكی ژ بۆ وان یا ب زەرەرە، لەوما ب بۆچوونا من هەر كەسەكی دۆلار هەبن نەكەتە دینار، چونكی بەردەوام دۆلار یێ بلند دبیت.
