قەرێ ئاڤێ دێ هێتە كێمكرن
هەولێر، قائید میرۆ:
رێڤەبەرێ گشتیێ ئاڤێ داخوازا كێمكرنا قەرێ ئاڤێ دكەت و دبێژیت: ئەگەر بڕیار بهێتە پەسەندكرن، قەرێ ئاڤێ 20%ێ دێ هێتە كێمكرن و بۆ دەمێ دو مەهان وەلاتی دشێن ژ كێمكرنا قەرێ ئاڤێ یێ مەهێن بۆری مفادار بن.
ئاری ئەحمەد، رێڤەبەرێ گشتیێ ئاڤا هەرێما كوردستانێ بۆ رۆژناما ئەڤرۆ دیار كر، وان داخواز ژ سەرۆكایەتیا جڤاتا وەزیرێن هەرێما كوردستانێ كریە داشكاندن بۆ قەرێ ئاڤێ بهێتە كرن و گۆت: «هەردەمێ بڕیار ژ لایێ سەرۆكایەتیا جڤاتا وەزیران ڤە هاتە پەسەندكرن، ئێكسەر دێ كەڤیتە د بیاڤێ بجهئینانێ دا، مە داخواز كریە 20%ێ قەرێ ئاڤێ ل سەر وەلاتیان بهێتە كێمكرن و دەمێ پەسەندكرنێ دێ بۆ دەمێ دو مەهان بیت و وەلاتی ژ بڕیارا كێمكرنا قەرێ ئاڤێ مفادار بن».
ئاری ئەحمەد گۆتژی: «بەری نوكە ژی ب هزاران وەلاتی ژ بڕیارێن كێمكرنا قەرێ ئاڤێ مفادار بووینە، هەردەمێ قەرێ ئاڤێ دهێتە كێمكرن ب هزاران وەلاتی سەرەدانا فەرمانگەهێن ئاڤێ دكەن بۆ دانا قەرێ ئاڤێ، لەوڕا ژی مە دڤێت وەلاتی مفادار بن و وەكی هاریكاریەك بۆ وەلاتیان پارێ ئاڤێ بهێتە كێمكرن».
