بازرگانەك: كڕین و فرۆتنا ترۆمبێلان د رەوشەكا خرابدایە
سولین سلێمان:
دگەل زۆریا هەژمارا ترۆمبێلان و زێدەبوونا كۆمپانیێن كرین فرۆتنا وان، لێ بازارێ وان وەكی ئەو دبێژن د رەوشەكا خراب دایە.
نوهات ئیبراهیم بازرگانێ گەروك و شارەزا د بازرگانیا ترۆمبێلاندا بۆ رۆژاناما ئەڤرۆ راگەهاند؛ بازرگانیا ترۆمبێلان ل كوردستانێ ب گشتی و ل دهۆكێ ب تایبەتی، د رەوشەكا گەلەكا خرابدایە، ئانكو ئەگەر ب ڤی شێوازی ب رێڤەبچیت ژ بۆ دەمەكێ درێژتر گەلەك دێ دەستا ژ وی كاری بەردەن، وەكی گەلەك نموونێن دی من دیتی كۆ دەست ژ ڤی كاری بەرداینە، هندەك ژی چاڤەرێنە ئابورێ كوردستانێ باشتر ببیت و دیسان شول بكەنەڤە.
ئاشكرا ژی كر؛ پتریا وان بازرگانا ژ بەریكا خۆ كریا جهێن خۆ و كرێكارێن خۆ ددەن، داخازیا خەلكی نۆكەدا ل سەر وان جورە ترۆمبێلانە ئەوێن ئەرزان، ئانكو بهایێ وان دەفتەرەك یا خارتر ب رێژا ئێكێ، رێژا دووێ ئەو ترومبێلێن بهایێ وان دەفتەر و نیڤا، ئەڤە ژی داخازییەكا ناڤنجیە ئەوا دی ژی ژ بۆ دو دەفتەر و سێ دەفتەران پتر ئەڤ داخازیە گەلەكا كێمە، ئەڤ چەندە ژی ژبەر رەوشا نۆكە یا ئابوری د شیانێن واندا نەمایە بشێن ترۆمبێلێن گرانبها بۆ خۆ بكرن، داخازیا زۆر یا جۆری دویێ یا بازاری سەر كرینا ترۆمبێلانە ب شێوازێ قست، رۆژانە خەلكی داخازییەكا گەلەك سەر كرینا ترۆمبێلانە ب قست، ئەو ژی ژبەركو بارا پتریا خەلكی فەرمانبەرێن حوكمەتێنە.
ئاماژەكر؛ بازارێ كرین فرۆتنا ترۆمبێلا د رەوشەكا گەلەكا خرابدایە، ئەو ژی ژ بو دو ئەگەرێن مەزن دزڤریت، ئێك ژ وان ئابوورێ كوردستانێیە، ئەو رەوشا نۆكەیا گرانیا بهایێ دولاری نە جێگیریا بهایێ وێ، ئەڤە ئەگەرەكە كۆ خەلك نەشێت ترۆمبێلا خۆ بكریت یان ژی بفرۆشیت، چونكی نزانیت ئەرێ دێ دۆلار بلندتر بیت یا دێ هێتە خار، ئەڤە ئەگەرەكێ مەزنە د هەمبەر دا بازار راوەستاندیە، یا دووێ ژی هەر یا د ئابووریە.
زێدەتر گۆت: ئەگەرێن دی ژی بازرگانی ب خۆیە، دبینین كۆمپانیەك یا د دەستێ بازرگانەكیدا یان ژی گەلەك ترۆمبێلێن د دەستێ بازرگانەكیدا، لێ ئەگەر ئەم ل دوو بچین سەحكەینە سیفاتێن بازرگانیێ دەم كێم ژ بازرگانان هەنە كۆ خودان شیان بن، پتریا بازرگانێن مە تنێ ب ناڤ بازرگانن، كێم ژ بازرگانا هەنە كۆ بازرگانێن درستن و دزانن كۆ د رەوشەكا هوسا یا خرابدا دی ماركێتینگا خۆ چاوا سەرەدەریێ گەل كەن كا چاوا ژ بۆ خەلكی ساناهیكاریی بكەن و بشێن بازاریا خۆ بكەن.
ئاماژە ب وێ یەكێ ژی دا، د ڤی رەوشێ ژی دا هەر بازارێ وان یێ گەرمە، چونكی ئەو شولا خۆ دزانن، بۆ نموونە دولاری دكەنە برێمەر، یان ژی دێ دولاری بهایەكێ كێمتر دەن، یان ژی دێ هندەك پلانا دانان ژ بۆ هاریكاریا خەلكی وەكی نموونا فرۆتنا ترۆمبێلان ب شێوازێ قست، بارا پترا وانا ئەون ئەوێن چاڤەری ئابورا كوردستانێ دكەن دروست ببیت و كاری وان ژی دێ چێبیت.
