دانا مووچەیێ فەرمانبەران ب شێوەیەكێ راستەوخۆ ب تنێ موزایەدەیە
دووڤچوون:
ئەندامەكێ خولا پێنجێ یا پەرلەمانێ كوردستانێ، بەرسڤا وان موزایدا ددەت یێن كۆ بەحسا وێ ئێكی دكەن بەغدا یا ئامادەیە راستەوخۆ مووچێن مووچەخۆرێن كوردستانێ فرێكەت و دبێژیت: ”ئەڤە ژی وەكۆ هەوێن دی، دێ بیتە بلقا سەر ئاڤێ“.
چەندین كەسێن شۆڤێنی یێن بەغدا و نەیارێن نافخۆیا كوردستانێ، وەكۆ یوسف كیلابی و شاسوار عەبدولواحید و غالب محەمەد، بانگەشا وێ ئێكێ دكەن كۆ بزاڤ كرینە، حوكمەتا ئیراقێ ب شێوازەكێ راستەوخۆ مووچێن مووچەخۆرێن كوردستانێ بدەت.
د ڤی واریدا ئیدریس ئیسماعیل، ئەندامێ خولا پێنجێ یا پەرلەمانێ كوردستانێ گوت: ”ئەو بانگەشێن دهێنە كرن و ئەو نڤیسارێن بۆ پەرلەمانێ عێراقێ هاتنە كرن، كۆ بەغدا یا ئامادەیە مووچێن مووچەخۆرێن كوردستانێ راستەوخۆ فرێكەت، هەموو موزایدەنە و چ پێنگاڤێن كرداری د ڤی واریدا نینە، بەغدا دان ب نیڤا مووچەخۆرێن كوردستانێ نائینیت و یا ئامادە ژی نینە كۆ مووچێن هەیڤانە یێن مووچەخۆران ب تەمامی بدەت، ژبەركۆ هەر كەسەك موزایدێ ب ڤی بابەتی بكەت، بلا بپرسیت، كۆ حوكمەتەك یا ئامادە نەبیت مووچێن هەیڤانە یێن مووچەخۆران فرێكەت، چاوا یا ئامادەیە راستەوخۆ پاران بدەت؟.“
گوتژی: هنارتنا نڤیسارەكێ بۆ پەرلەمانێ عێراقێ، تنێ بۆ لڤاندنا جادێ و هاندانا خەلكی یە ل دژی هەرێما كوردستانێ، ئەگەر حوكمەتا ئیراقێ یا جددی بیت لسەر ڤی بابەتی، نڤیسارا ب ڤی شێوەی بۆ لژنا داراییا پەرلەمانێ ئیراقێ ناهنێریت، بەلكۆ دێ دگەل حوكمەتا هەرێما كوردستانێ گوتوبێژان كەت، بەلێ ئەو نەك جددی نینە، بەلكو مووچەژی بكەڤیتە دەستێ وان، دێ وەكۆ بودجا كوردستانێ چاوا 10 ساڵێن تەمامە دبەن و كەس ژی نزانیت چ لێ كریە!.
