ل نێزیك بنگەهێ ساخلەمیا دینارتە دێ كەڤیتە د خزمەتا وەلاتیان دا
رێڤەبەرێ ناوچەداریا دینارتە یا سەر ب دەڤەرداریا ئاكرێ ڤە دیار كر، ب بڕیارا سەرۆكێ حوكمەتا هەرێما كوردستانێ نەخۆشخانەك ل دینارتە دهێتە دروستكرن، هەتا نوكە كارەكێ باش تێدا هاتیە كرن و بڕیارە د مەها نیسانا ئەڤ سالە دا تەمام ببیت و بكەڤیتە د خزمەتا وەلاتیێن وێ دەڤەرێ دا.
سەربەست سەبری ئاكرەیی، زێدەتر بۆ رۆژناما ئەڤرۆ گۆت: ل ناوچەداریا دینارتە دەست ب دروستكرنا بنگەهەكێ ساخلەمیێ ژ جۆری A هاتیە كرن، هەموو پشكێن گرنگ یێن ساخلەمیێ د ناڤ دا هەنە، وەكو پشكا ژ دایكبوونێ و تیشكێ و سۆنار و چەندین پشكێن دیتر و گۆت: «ئەو بنگەهە ل سەر ڕووبەرێ پێنج هزار مەتران هاتیە دروستكرن و ملیارەك و 29 ملیۆن دینار بۆ هاتینە تەرخانكرن، هەتا نوكە كارەكێ باش تێدا هاتیە كرن و 50%ێ كارێن وی بنگەهی تەمام بووینە و بڕیارە د مەها نیسانا ئەڤ سالە دا بكەڤیتە د خزمەتا وەلاتیان دا».
ناڤهاتی گۆتژی: «چێكرنا وی بنگەهێ ساخلەمیێ گەلەك گرنگیا خوە بۆ خەلكێ ناوچەداریا دینارتە هەیە، هەتا نوكە مە چ نەخۆشنانە ل وێ دەڤەرێ نەبوون و خەلكێ ڤێ دەڤەرێ كو 80 گوند دێ مفای ژ وی بنگەهێ ساخلەمیێ بینن، بەری نوكە خەلكێ ناوچەداریا دینارتە دچوونە ئاكرێ بۆ چارەسەریێن ساخلەمیێ، ئەم سوپاسیا حوكمەتا هەرێما كوردستانێ دكەین، كو ئەڤ نەخۆشخانە بۆ مە دروستكری».
