بەغدا دێ بەنداڤان ل پارێزگەها دهۆكێ چێكەت
رێڤەبەرێ گشتیێ بەنداڤان ل وەزارەتا چاندنێ دیار كر، دانوستانێن د ناڤبەرا هەرێما كوردستانێ و بەغدا دا بۆ چێكرنا هەژمارەكا بەنداڤان د بەردەوامن و بڕیارە چار بەنداڤ ل هەرێما كوردستانێ بهێنە چێكرن و دبێژیت: دو ژ وان بەنداڤان دكەڤنە سنوورێ پارێزگەها دهۆكێ.
رەحمان خانی، رێڤەبەرێ گشتیێ بەنداڤان ل وەزارەتا چاندنێ یا حوكمەتا هەرێما كوردستانێ بۆ رۆژناما ئەڤرۆ دیار كر، بڕیاربوو هەژمارەكا بەنداڤان ژ لایێ حوكمەتا ئیراقێ ڤە ل هەرێما كوردستانێ بهێنە چێكرن و گۆت: «دو ژ وان بەنداڤان دكەڤنە سنوورێ پارێزگەها دهۆكێ، ئەو ژی: بەنداڤێن مەنداوە و باكورمانن، بەلێ بجهئینانا پڕۆژەیێ وان بەنداڤان گیرۆ بوویە و هەتا نوكە نەچوویە د بیاڤێ بجهئینانێ دا، هەرچەندە دانوستاندن د ناڤبەرا هەرێم و بەغدا دا دهێنە كرن بۆ دەستپێكرنا وان بەنداڤان».
رەحمان خانی گۆتژی: «ئەز باوەرم ئەڤ سالە بودجە بۆ چێكرنا وان بەنداڤان دێ هێتە مەزاختن و كەڤنە د بیاڤێ بجهئینانێ دا، بێگومان دروستكرنا وان بەنداڤان دێ كاریگەری ل سەر كەرتێ ئاڤێ هەبیت، ژ بەركو بەنداڤێن مەزنن، ژبلی عمباركرنا ئاڤێ دێ كاریگەری ل سەر ئاڤا بن ئەردی و كەرتێ گەشتیاری و چاندنێ ژی هەبیت ل ئەڤان دەڤەرێن بەنداڤ تێدا دهێنە چێكرن».
