گوهدار شێخۆ و بەرپرسێ سەربازی یێ ئیتالیا كۆمبوون
زاخۆ، دلۆڤان هالۆ:
شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو گوهدار شێخۆ، سەرپەرشتێ ئیدارەیا سەربخوە یا زاخۆ، پێشوازی ل كۆلۆنێل فرانسیسكۆ ئەنتۆنیۆ، بەرپرسێ هێزێن سەربازی یێن وەلاتێ ئیتالیا ل هەرێما كوردستانێ و ئیراقێ و شاندێ د گەل دا كر.
بەرپڕسێ ڕاگەهاندنا ئیدارەیا سەربخوە یا زاخۆ، ئاماژە ب وێ چەندێ ژی كر كو د ڕوونشتن و هەڤدیتنێن خوە دا، شێخۆ د دەربارەی باژێرێ زاخۆ دا دیار كر، زاخۆ باژێرەكێ بازرگانی، گەشتیاری، ستراتیژی و سنووری یێ گرنگە د ناڤبەرا وەلاتێن توركیا و سووریا و ئیراقێ دا.
شێخۆ خوەیا ژی كر، هێزێن سەربازی یێن وەلاتێ ئیتالیا د شەڕێ دژی داعشێ دا، ڕۆلەكێ گرنگ هەبوو د گەل هێزێن پێشمەرگەی، پاشی ب هەڤرا سەرەدانا بازارێ كەڤنارێ زاخۆ و كۆڕنیشێ پرا دەلال كرن.
