سالڤەگەڕا وەغەركرنا نەمر ئدریس بارزانی ل ئامێدیێ هاتە ساخكرن
مەحمود نهێلی:
د بیرەوەریا خەمناكا وەغەرا داویێ یا جوانەمەرگ ئدریس بارزانی دا و ل ژێر چاڤدێریا بەرەڤان حەمدی، بەرپرسێ لقێ ١٨ یێ پارتی دیموكراتی كوردستان و ئامادەبوونا سەباح بەیتوللا، جێگرێ بەرپرسێ مەكتەبا ڕێكخستنا دهوكێ، فەریق فاروق بەرپرسێ پشكا ڕێكخستنێ ل مەكتەبا ڕێكخستنێ و كارگێری و تەڤایا كادرێن لقێ خولەكا رەوشەنبیری و گەشەپێدانا كادران هاتە ڤەكرن.
بەرەڤان حەمدی، بەرپرسێ لقێ 18 یێ پارتی د پەیڤەكێ دا چەندین تەوەرێن جودا ل دۆر ژیان و ساخلەتێن جوانەمەرگ ئدریس بارزانی بەرچاڤكرن و بەحس ل كەسایەتی و سیاسەتمەداری و كارێزمایا نەمر ئدریس بارزانی كر و تەكەز كر، كو هەردەم یێ كارا و خودان بڕیار و كاریگەر بوو د قادا سیاسەت و پێشمەرگەیاتیێ دا و گۆت: «ب تایبەت د رێككەفتنا ١١ی ئادارێ دا پتر شیان و كاریزمایا وی دیاربوو د چێكرنا بوویەرێن مەزن دا، ئەركێ مەیە ئەم ڤان قارەمانان ژبیر نەكەین، دا كو بشێین بۆ سوبەهی ژی قارەمانان چێكەین».
هەر ب ڤێ هەلكەفتێ سەباح بەیتوللا، جێگرێ بەرپرسێ مەكتەبا رێكخستنا پارتی ل دهۆكێ یا پارتی دیموكراتی كوردستان پەیڤەك پێشكێشكر و تێدا تیشك ئێخستنە سەر چەند وەستگەهێن ژیانا نەمر ئدریس بارزانی و ئاماژە دا ساخلەتێن وی یێن سەركردایەتیێ و خوەراگری و ئیدارەدان و بڕیاردانێ ل دەم و جهێن پێدڤی و گۆت: «جوانەمەرگ ئدریس بارزانی ئەو هەموو ساخلەتە ژ شێخ عەبولسەلام بارزانی و شێخ ئەحمەد بارزانی و بارزانیێ نەمر وەرگرتبوون، هەر ژ زارۆكینیێ هەست ب مەزلۆمیەتا گەلێ خوە دكر و هەردەم بزاڤ كریە بۆ ئێكگرتنێ و ئێكرێزیا گەلێ كورد بۆ وێ یەكێ ژ بن زۆلم و زۆریێ قورتال ببن و ببنە خودان كیانەكێ سەربخوە و ئازاد».
