ژن بەرپرسا ئێكێ یە بۆ مەزاختیێن خێزانێ
بێوار حەمدی:
گەلەك جاران دبێژن ژن پتر ژ زەلامی خەرجیان دكەت، بەلێ ئەڤە بو وێ چەندێ ڤەدگەڕیت كۆ ژن پتر ب هویری پێدڤیێن مالێ دزانیت، چالاكڤانەكا جڤاكی ژی گۆت: ژبەركۆ دابینكرنا پێدڤیێن ناڤ مالێ بەهرا پتر د ستویێ ژنێ دانە، لەوما كاودان وەسا دخوازن كۆ ژن ببیتە بەرپرسا ئێكێ ژ مەزاختیێن خێزانێ.
هەیفا دوسكی، چالاكڤان د بیاڤێ جڤاكی دا د دیدارەكێ دا بۆ رۆژناما ئەڤرۆ دیار كر كو بەرپرسا ئێكێ ژ مەزاختیێن خێزانێ ژنە، چونكی ژن پتر دشێت وی ئاستێ بەرپرسایەتیێ ب هەلگریت و گۆت: (بەهرا پتر زەلام ژێدەرێ ئینانا داهاتیە بو ناڤ خێزانێ، بەلێ ئەڤرو كاودان وەسا دخوازن كو ئێدی ژن ژی ژ دەرڤەی ماڵێ كار بكەت و ببیتە خودان داهات و بەرپرسا ئێكێ ژ خەرجكرنێ، ژبەركۆ دابینكرنا پێدڤیێن ناڤماڵێ د ستویێ ژنێ دانە).
چالاكڤانا جڤاكی د بەردەوامیا ئاخفتنێن خۆدا گۆت: (گەلەك جاران دبێژن ژن پتر ژ زەلامی خەرجیان دكەت، بەلێ ئەڤە بۆ وێ چەندێ ڤەدگەڕیت كۆ ژن پتر ب هویری پێدڤیێن مالێ دزانیت و زەلام بەهرا پتر ژ دوور و ب سەرڤە بەرێ خو ددەتە پێدڤیێن خێزانێ و پێدڤیە ژن بوچونا زەلامی ل سەر خەرجیان وەربگریت، وەكو رێزگرتن و مافێ زەلامی یە ژی .بزانیت كا داهاتێ خێزانێ ل چ دهێتە خەرجكرن).
هەیفایێ ئەو چەندە ژی دا زانین، كاودانێن ژیانێ هاتینە گوهوڕین و رەوشا ئابوری یا پتریا خێزانان ب زەحمەت كەفتیە، لەوما هەكە د شیان دا بیت باشترە ژن و مێر هەردوو خۆدان داهات بن و گۆت: (بەلێ مەرج نینە پارێ خۆ بكەنە ناڤ ئێكدا و پێكڤە خەرج بكەن، چونكی د گەلەك ڤەكولینێن زانستی دا هاتیە كو كێشە ژ ڤێ چەندێ دروست دبن، بەلكو باشترە ژن ژی پشكەكا پارەی خەرج بكەت و هاریكاریا هەڤژینێ خو بكەت).
